Қытайда қандасымыз жеңіл атлетикадан бір аптада екі рет бас жүлде жеңіп алды
АСТАНА. KAZINFORM – Қытайда тұратын қандасымыз Дина Нұрланқызы жеңіл атлетикадан жабық кешендегі Қытай чемпионатында биіктікке секіру жарысынан бас жүлдені қанжығалады. Бұл туралы қытайлық kazakcnr.com (CNR) хабарлады.
Жеңіл атлетикадан жабық кешендегі әйелдер арасындағы биіктікке секіру жарысында Дина Нұрланқызы 1.87 метрлік нәтижемен бас жүлдені қанжығалады. Ол Осыдан бір апта бұрын жеңіл атлетикадан жабық кешенде өткен Ұлттық Гран-при жарысында да 1.87 метрлік көрсеткішпен чемпион атанған болатын.
Дина Нұрланқызы 1,90 метрді бағындыра алатынына сенімді. Ол жаттығуда 1,90 метрден асып кеткенін және келесі жарыстарда өзінің осы межені бағындыруға тырысатынын айтқан.
Айта кетейік, Дина Нұрланқызы 1998 жылы Қытайдың Құлжа ауданының Ойманбұлақ ауылында дүниеге келген. 15 жасында Шыңжаң құрамасына қабылданған. Ол 2021 жылғы жеңіл атлетикадан ұлттық чемпионатта биіктікке секіруден 1,84 метр көрсеткішімен екінші орынды жеңіп алса, 2023 жылғы жеңіл атлетикадан ел чемпионатында бас жүлдені еншілеген. Дина Нұрланқызының бойының биіктігі 1,87 метр. Ол Шыңжаңдағы биіктікке секіру спортшылары арасындағы ерекше талант иесі.
Еске сала кетейік, бұған дейін тибетте көшпелілер мәдениетін әйгілейтін ерекше шайхана ашылғаны туралы жазған болатынбыз.
