Қытайда тағы бір қандасымыз қысқы Азия ойындарының жүлдегері атанды
ХАРБИН. KAZINFORM – Қытайда туып-өскен тағы бір қандасымыз Қанағат Мұхаммедұлы конькимен жүгіруден IX қысқы Азия ойындарының жүлдегері атанды.
Нақтырақ айтсақ, Харбинде өтіп жатқан қысқы Азияда ойындарында Қытай құрамасының атынан сынға түсіп жатқан Қанағат Мұхаммедұлы 5000 метр қашықтыққа конькимен жүгіруден қола медальға қол жеткізді.
Ол аталған қашықтықты 6:31.54 секундта жүгіріп өтті. Бұл сайыс түрінен барлық жүлдені жарыс қожайындары қанжығаларына байлады. Атап айтсақ, алтын жүлдені Қанағат Мұхаммедұлының командасы Ву Ию 6:27.81 нәтижесімен жеңіп алса, күміс медальға тағы бір қытайлық спортшы Лию Ханбин еншіледі. Ол аталған қашықтықты 6:29.93 уақыт көрсеткішімен бағындырды.
Айта кетейік, Қанағат Мұхаммедұлы Қытайдың Шыңжаң-Ұйғыр автономиялық ауданына қарасты Алтай ауылында 1999 жылы дүниеге келген.
Естеріңізге сала кетсек, осыған дейін Қытайда туып-өскен тағы бір қандасымыз Самғар Серікұлы ерлер арасында шаңғымен сырғанаудан спринт бағдарламасында қола медаль жеңіп алғанын жазған едік.
Сондай-ақ, шаңғы жарысынан әйелдер арасында 5 шақырымға сырғанаудан (еркін стиль) қытайда тұратын қазақ қандасымыз Баян Жалынқызы чемпион атанған еді.
