Қытайда тайға таңба басу рәсімі өтті
АСТАНА. KAZINFORM – Қытайдың Ішкі Моңғол автономиялық регионы Тонляо қаласы Залут өңірінде тайға таңба басу рәсімі өтті, деп хабарлайды қытайлық «Халық газеті».
Бұл іс-шара көптеген шабандоздарды қызықтырды. Тайға таңба басу -моңғол халқының ежелден келе жатқан дәстүрі. Әр көктемде малшылар 2 жасар тайлардың «есею рәсімін» өткізеді. Бұл күні тайларға таңба басылып, жал-құйрығы күзеліп, үйірге қоя беріледі. Бұл оның құлын күнімен қош айтып, есейгенін, ат болғанын білдіреді.
Таңба әдетте жылқының жамбасына немесе алдыңғы аяғына басылады. Таңба олардың жылқы түлігіне қосылуының және сынға толған сапалы мал екенінің белгісі саналады. Сонымен қатар тайға мөр басылғаннан кейін, көпшілік сол таңбадан жылқының кімнің малы екенін ажыратып отырған.
Айта кетейік, Қазақта «Күйгізбесең күйесің» деген аталы сөз бар. Атам заманнан бері қазақ әсіресе жылқы малына рудың арнайы бекітілген таңбаларын басып келді. Ата-бабамыз жылқыны тайында (жабағысында) таңбалаған. Содан да болар анық, айқын көрініп тұрған бөгенай-белгіні «тайға таңба басқандай» дейді.
Еске сала кетейік, бұған дейін Шыңжаңда Жанәбіл Сымағұлұлы ел басқарған жылдары 733 қазақ мектебі болғаны туралы жазғамыз.
