Қытайдағы Қазақстан туризмі жылы: эстрада жұлдыздары Бейжіңде өнер көрсетті
БЕЙЖІҢ. KAZINFORM – Бүгін Бейжіңде Қытайдағы Қазақстан туризмі жылының ашылуы аясында қазақ эстрадасының жұлдыздары өнер көрсетті.
Атап айтсақ, гала-концертке Қазақстанның халық әртісі Роза Рымбаева, ҚР еңбек сіңірген әртісі Майра Мұхамедқызы, опера әншісі Зарина Алтынбаева, «Ұлытау» этно-рок тобы, Абай атындағы ҚазҰОБТ хор ұжымы, «Серпер» және «Сазген сазы» ансамбльдерінің шығармашылық ұжымдары, «Астана Балет» балет труппасы бастаған өнерпаздарымыз қатысты.
Қазақстан туризмі жылы ресми ашылуының гала-концерті China National Opera House өтті. Салтанатты кеште отандық әртістер халқымыздың мәдениеті мен өнерін тағы бір паш етті.
Әншілеріміз қытай халқына құрмет ретінде олардың ұлттық әндерін де шырқады. Сонымен қатар концертке жиналған қонақтар қытайлық әртістердің де өнерін тамашалады.
Айта кетсек, жылдың ресми ашылуы халықаралық туризм мен инвестицияларға арналған форумнан басталып, Қазақстанның көрмесі және этно-ауылдағы мәдени іс-шаралармен жалғасты. Қазақстан делегациясы қатарында министрлік, туризм, бизнес, спорт пен өнер саласының өкілдері бар.
