Қытайдағы зілзаладан кейін 2 500-ден астам құтқарушы жұмыс істеп жатыр
АСТАНА. KAZINFORM — Қытайдың оңтүстік-батысындағы Сицзан автономиялық ауданындағы Нагчу округтік деңгейдегі қаланың Бачен уезінде магнитудасы 7 балға жеткен жер сілкінісінен кейін іздестіру-құтқару және зардаптарды жою жұмыстары жалғасып жатыр.
Синьхуа агенттігінің мәліметінше, бұл туралы жергілікті билік сенбі күні хабарлады.
Бейжің уақытымен бейсенбі күні сағат 22:33-те болған жер сілкінісінен 16 адам қаза тауып, тағы 76 адам зардап шекті. Жерасты дүмпулері салдарынан 339 үй шаруашылығына тиесілі ғимараттар мен мал ұстауға арналған 20 нысан бүлінген немесе қираған.
Жергілікті төтенше жағдайлар штабының мәліметінше, сенбі күні сағат 11:00-дегі жағдай бойынша зардап шеккен 76 адамның барлығы уақтылы медициналық көмек алып жатқан. Ал бастапқыда ауыр жарақат алғандар қатарына жатқызылған 11 адамның бесеуінің жағдайы жақсарып, жарақаты жеңіл деп бағаланған.
Зардап шеккен аудандарға апаттан кейінгі көмекке қажетті заттар жеткізіліп, құтқару қызметтерінің мамандары да келіп жатыр. Сенбі күні сағат 11:00-дегі жағдай бойынша апат аймағына 52 450 көмек құралы мен жабдық жөнелтілген. Құтқару жұмыстарына 2 500-ден астам маман қатысып жатыр.
Жеткізілген көмектің ішінде 4 651 шатыр, 2 000 құрастырмалы үй, 11 772 жиналмалы төсек, 5 715 көрпе және қыс мезгіліне қажетті басқа да заттар бар. Апат аймағына Wing Loong атты ірі ұшқышсыз ұшу аппараты да жеткізілді.
Бұдан бөлек, жергілікті билік 35 уақытша орналастыру пунктін ұйымдастырған. Онда Бачен уезінен 1 600-ден астам қызметкер, Нагчу қаласының өрт сөндіру-құтқару бөлімінен 347 өрт сөндіруші және қоғамдық қауіпсіздік органдарынан 530 полиция қызметкері жіберілген. Сондай-ақ апат аймағына көлік құралдары мен иісшіл иттер жеткізілді.
Сенбі күні сағат 14:00-дегі мәлімет бойынша, апат аймағында 949 афтершок тіркелген. Оның сегізінің магнитудасы 4,0–4,9 аралығында, ал 33-інің магнитудасы 3,0–3,9 аралығында болған.
China Railway Qinghai-Xizang Group Co., Ltd. компаниясының мәліметінше, жұма күні кешке Цинхай–Сицзан теміржолының жер сілкінісінен зардап шеккен учаскесінде жылдамдыққа қойылған уақытша шектеулердің барлығы алынып тасталған. Кешенді тексеру барысында ешқандай ауытқу анықталмағандықтан, пойыздар қалыпты қозғалысына қайта кіріскен.
Қытайдың State Grid ұлттық электр желісі корпорациясының мәліметінше, сенбі күні кешке апат аймағында электрмен жабдықтау толығымен қалпына келтірілген.
Корпорацияның Сицзандағы электр энергетикалық компаниясы жер сілкінісінен кейін апат болған аумаққа электр қуатын жедел қалпына келтіру үшін арнайы бригадалар жіберген. Сенбі күнгі жағдай бойынша жұмысқа 300-ден астам қызметкер, көліктер, электр энергиясын өндіретін жабдықтар және апаттық-құтқару техникасы жұмылдырылған. Олар жергілікті жедел штабты электрмен қамтамасыз етуге, уақытша орналастыру пункттерін жарықтандыруға және зақымданған электр желілерін қалпына келтіруге көмектескен.
Нагчу қаласының Төтенше жағдайлар басқармасы партия комитетінің хатшысы Пань Чжицин зардап шеккен тұрғындардың барлығын қауіпсіз баспанамен, жылы киіммен, төсек-орынмен, ыстық тамақпен және таза ауызсумен қамтамасыз етуге уәде берді.
Бұған дейін Қытай жер сілкінісінен зардап шеккендерге 80 млн юань бөлгені хабарланды.
