Қытай қорғаныс министрлігі Тайваньға ескерту жасады: Ерте ме, кеш пе сендерді қайтарып аламыз

АСТАНА. KAZINFORM - Қытай қорғаныс министрлігінің ақпарат бюросының директоры және ұлттық қорғаныс министрлігінің баспасөз хатшысы У Цянь бейсенбі күні (27 ақпан) баспасөз мәслихатында Тайваньнның биылғы шілдеде ауқымды әскери жаттығулар өткізу жоспарын сынға алды.

Тайвань ақпарат құралдарының хабарлауынша, Тайвань 2025 жылдың шілде айында «Хан Куанг 41» атты ауқымды әскери жаттығу өткізуді жоспарлап отыр. Оқу-жаттығу 10 күнге созылады, жаттығуға 3 мыңнан астам сарбаз қатысады. Дереккөздер жаттығудың АҚШ-тан әскери кеңес алғанына назар аударды.

Бұл жаңалыққа жауап ретінде Қытай қорғаныс министрлігінің баспасөз хатшысы: «Тайвань мәселесі — Қытайдың ішкі ісі, ол сыртқы елдердің араласуына жол бермейді» деп баса айтты.

Қытай Қорғаныс министрлігінің өкілі АҚШ-тың Тайвань билігін арандату арқылы Қытайды бұзу және шектеу әрекетінің нәтижеге жетпейтінін және АҚШ-тың ақырында шығынға ұшырауына себеп болатынына назар аударды.

Ол сондай-ақ Тайвань билігіне «тәуелсіздікке» жету үшін Америка Құрама Штаттарының күшіне сене аламыз деп елестетуден аулақ болуды ескертті.

Мұндай көзқарас - өз күш-қуатын асыра бағалау және тек өзін-өзі жоюға әкеледі. Ерте ме, кеш пе сендерді қайтарып аламыз, - деді ол.

Қытай АҚШ-ты департамент сайтындағы Тайваньға қатысты қате мәліметті түзетуге шақырған еді.