Қытайлық астронавттар алғаш рет ЖИ ассистент көмегіне жүгінді

АСТАНА. KAZINFORM — Қытайдың «Тяньгун» орбиталық станциясының экипажына алғашқы ЖИ көмекші қосылды, деп хабарлайды China Daily.

«Батысқа саяхат» классикалық романының кейіпкері Маймыл патшасы Сунь Укун есімімен аталған «Укун» жүйесі «Тяньчжоу-9» жүк кемесі арқылы станцияға жаңа скафандр, жаңа піскен жемістер және басқа да керек-жарақтармен бірге жеткізілді.

«Укун» ЖИ отандық ашық модель негізінде жасалған және басқарылатын миссияларды қолдауға арналған. Ол мамандандырылған тілдік модельмен және ғарыштық ұшу стандарттарына бағытталған білім базасымен жабдықталған, бұл оған кәсіби тапсырмалардың кең ауқымын орындауға мүмкіндік береді.

Шэньчжоу-ХХ кемесінің экипажы жақында ғарышқа шығуға дайындық ретінде жүйені сынақтан өткізіп үлгерді. Миссия командирі Чэнь Дун мен астронавт Ван Цзе «Укунның» жұмыс кестесін сұрады, ал ЖИ дереу қажетті нұсқауларды берді. Ғарышкерлердің айтуынша, берілген ақпарат барынша толық және пайдалы болды.

Қытай астронавттарын дайындау және зерттеу орталығының қызметкері Цзоу Пэнфэй «Укунды» енгізу орбитада ЖИ моделін пайдаланудың алғашқы тәжірибесі екенін атап өтті. Жүйе бір ай бойы тұрақты жұмыс істеп, оң баға алды. Ол жердегі және орбиталық модульдерді біріктіріп, терең талдауды және маңызды мәселелерді тікелей бортта шешуді қамтамасыз етеді.

ЖИ ғарыштық нұсқасы да жылдам қайта конфигурациялауға және масштабтауға қабілетті. Ол экипажға миссияны жоспарлауда, деректерді талдауда және болжауда көмектеседі, жұмыс тиімділігін арттырады, астронавттардың психологиялық жағдайын қолдайды және ғарыш пен Жердің өзара әрекеттесуін жақсартады.

Бұған дейін ҚазҰУ-да жерүсті спутниктік станциясы салынатынын жазған болатынбыз.