Қытайлық қазақ балуан Азия чемпионатында қола жүлде жеңіп алды
АСТАНА.KAZINFORM – Қытайда тұратын қандасымыз Кабиран Абушайманұлы Иордания астанасы Амман қаласында өтіп жатқан Азия чемпионатында қола медаль жеңіп алды.
Синьхуа агенттігінің хабарлауынша, Қазақ балуаны ерлер арасында еркін күрестен 97 келі салмақта қола медаль үшін белдесуде Қырғыз спортшысы Каныбек Абдулхаировты қапы қалдырды, есеп 2:1.
Айта кетерлігі, қандасымыз ширек финалда Моңғол балуаны Ганхуяг Гамбатарды 2:1 есебімен жеңген болатын. Өкінішке орай, ол жартылай финалда жапониялық Араш Ёшидаға есе жіберді.
Бұған дейін хабарлағанымыздай, 97 келі салмақта күресетін қазақстандық Ризабек Айтмұхан финалдық белдесуде жапондық спортшыға жеңіліп, күміс медаль иеленген болатын.
Сондай-ақ, бүгін Азия чемпионатында еркін күрестен қазақстандық бес балуан боз кілемге шығады.
