Қытайлық жанкүйер: Балаларыммен Қазақстанды қолдауға келдім
ХАРБИН. KAZINFORM – Хоккейден Қазақстан қыздар құрамасы бүгін Қытайдың Харбин қаласында өтіп жатқан ІХ қысқы Азия ойындарының А тобындағы соңғы матчын өткізді. Kazinform тілшісі ойын барысында Қазақстан құрамасын арнайы қолдауға келген қытайлық жанкүйерлермен әңгімелесіп көрді.
Қытайлық көрермен Фан ханымның айтуынша, ол бүгін қазақстандық қыздарды қолдауға арнайы келген.
– Біз қысқы Азия ойындарының барлық ойындарын қарап отырмыз. Бүгін мен балаларыммен бірге арнайы Қазақстан құрамасына жанкүйер болып келдім. Екі баламада Қазақстан командасының ойындары ұнайды. Маған 15-ішні нөмердегі ойыншыны ұнады, күші мығым және жақсы қорғаныс ұйымдастырады, - деді ол.
Оның айтуынша, Қазақстан құрамасы хоккейден өздерінің мықтылығын тағы да дәлелдеді.
– Шыны керек, Қазақстан хоккей спортынан мықты екенін көрсетті. Кезекті жеңістеріңізбен құттықтаймын, - деді Фан ханым.
Сонымен қатар қытайлық көрермен достық әрқашанда бірінші болу керек екенін баса айтты.
– Мен осы қысқы Азия ойындары арқылы Қытай-Қазақстан арасындағы достықтың тереңдей беруіне тілектеспін. Менің ойымша, достық бірінші, ал жарыс екінші орында, - деді ол.
Айта кетейік, хоккейден Қазақстан қыздар құрамасы А тобындағы маңызды матчында Оңтүстік Кореяны 3:0 есебімен жеңіп, күміс жүлдеге бір табан жақындады.
Қыздар арасындағы чемпиондық матч Қытай және Жапония құрамалары арасында өтеді. Егер жапондық қыздар жеңіске жетсе, қазақстандықтар күміс медаль иегері атанады. Тиісінше, қола медаль Қытайға бұйырады.
Осыған дейін хабарлағанымыздай, қыздарымыз А тобындағы алғашқы ойында Жапонияға 0:4 есебімен жол берген болатын.
Ал Қытай құрамасына қарсы ойында, қазақстандықтар 2:1 есебімен жеңіске жетті.
