Қытайлықтардың 70 пайызы салмақ тастағысы келеді

АСТАНА. KAZINFORM — Қытайлықтардың 70 пайызы салмақ тастауды армандайды, ал 60 пайыздан астамы бұл мақсатқа жету үшін уақыт пен күш жұмсауға дайын, деп хабарлайды Синьхуа.

Бұл туралы Фошань қаласында (Гуандун провинциясы, Оңтүстік Қытай) сенбіде өткен семіздіктің алдын алу жөніндегі конференцияда жарияланған Қытайдағы ересектердің денсаулығы және салмақ бақылауы туралы ақ кітапта айтылған.

Ақ кітапта Қытайда өз салмағын өлшеген ересектердің жартысы оның нақты дене массасы индексіне (ДМИ) сәйкес келмейтінін анықтағаны атап өтілген. Атап айтқанда, қытайлық ересектердің 14 пайызы өз салмағын қалыпты деп бағалаған, бірақ шын мәнінде ДМИ өлшемі бойынша артық салмағы бар болып шыққан.

Қытайдың профилактикалық медицина қоғамының төрағасының орынбасары Лян Сяофэннің пікірінше, өзін-өзі бағалаудағы мұндай дәлсіздік жүрек-қан тамырлары және цереброваскулярлық аурулардың, қант диабетінің және басқа да созылмалы аурулардың алдын алу мен бақылауды қиындатады. Өз кезегінде бұл халықтың семіздіктің денсаулыққа қаупі туралы жеткіліксіз түсінігін көрсетеді.

Қытайдың денсаулық сақтау істері жөніндегі мемлекеттік комитетінің деректері бойынша, қазіргі уақытта қытайлық ересектердің 34,3 пайызы артық салмақтан зардап шегеді, ал 16,4 пайызы семіздікке шалдыққан. Егер бұл қауіпке қарсы шаралар қабылданбаса, 2030 жылға қарай Қытайдың ересек халқының 70,5 пайызы артық салмақтан немесе семіздіктен зардап шегетін болады, бұл 61 миллиард АҚШ доллары көлемінде медициналық шығындарға әкеледі.

Осыған жауап ретінде 2024 жылдың маусым айында билік салмақ бақылау үшін қолайлы жағдайлар жасауға бағытталған үш жылдық жалпыұлттық науқанды бастады. Көптеген ауруханаға семіздіктің алдын алу және оған қарсы күрес орталықтарын құру ұсынылды. Онда салмақ тастау бойынша стационарлық қызметтер көрсетіледі. 2025 жылдың маусымына қарай мұндай қызметтердің дерлік толық қамтылуына қол жеткізіледі деп күтіліп отыр.

Ақ кітапта қазіргі уақытта Қытай халқының жартысынан астамы салмағын бақылау үшін белсенді қадамдар жасап жатқаны, майы, тұзы және қанты аз диеталарды ұстанатыны және тағамға қолайлы баламаларды таңдайтыны айтылған.

Бұған дейін Қытай Жердің электромагниттік өрісін бақылау үшін 3 жер серігін ұшырғанын жаздық.