Қызылорда облысында ұзындығы 266 шақырым жол жөндеуден өткізілуде

АСТАНА. KAZINFORM - Қызылорда облысында биыл ұзындығы 266 шақырымды құрайтын автомобиль жолдары, көшелер мен көпір өткелдері жөндеуден өткізілуде.

Облыста жергілікті маңызы бар автомобиль жолдарының жалпы ұзындығы - 3 580,5 шақырым. Оның ішінде 1 014,5 шақырымы республикалық, 555 шақырымы облыстық, 2 011 шақырымы аудандық маңызы бар автомобиль жолдары.

«Биыл жол инфрақұрылымын дамыту үшін түрлі жобалар әзірленіп, ұзындығы 266 шақырымды құрайтын автомобиль жолдары, көшелер мен көпір өткелдері жөндеуден өткізілуде.

2024 жылы облыстық және аудандық маңызы бар автомобиль жолдарының жақсы және қанағаттанарлық индикаторлық көрсеткішінің үлесін 92 %-ға жеткізу межеленген. Қала аумағындағы көшелерге қайта жаңғырту жұмыстарын жүргізілуде. Бүгінде облыс аумағында 212 елді мекенді аудан және облыс орталығымен байланыстыратын 205 автобус маршруты ұйымдастырылған. Сондай-ақ Ташкент қаласына халықаралық және Астана, Алматы, Шымкент, Жезқазған, Түркістан, Сарыағаш, Ақтөбе және тағы басқа қалаларға облысаралық 13 автобус маршруты ұйымдастырылған. «Қорқыт Ата» әуежайы арқылы аптасына барлығы 30 рейс орындалуда», - деді облыстық жолаушылар көлігі және автомобиль жолдары басқармасының басшысы Жәнібек Сыздықов.