Қызылордада абаттандыру қағидаларын бұзған 7 мыңнан астам адам жазаланды
ҚЫЗЫЛОРДА. KAZINFORM — «Таза Қазақстан» экологиялық акциясы аясында қызылордалық тәртіп сақшылары қала әкімдігі және «Қызылорда тазалығы» мекемесінің қызметкерлерімен рейдке шықты.
Тексеру барысында кейбір кәсіпкерлік нысандарында абаттандыру және тазалық талаптарының сақталмағаны анықталды. Осыған байланысты учаскелік полиция инспекторлары түсіндіру жұмысын жүргізіп, ескерту берді.
— Биылғы 7 айда абаттандыру қағидаларын бұзудың 9 мыңнан астам, ортақ пайдаланылатын орындарды ластау бойынша 1 932 әкімшілік құқықбұзушылық анықталды. Абаттандыру қағидаларын бұзғаны үшін 7 163 тұлға әкімшілік жауапкершілікке тартылды. 20 заңсыз қоқыс үйіндісі анықталып, олар бойынша тиісті шаралар қабылданды, — делінген облыстық полиция департаментінің хабарламасында.
Ал жуырда Атырау облысында үйі мен ғимаратының айналасын талапқа сай күтіп ұстамаған 419 адам әкімшілік жауапкершілікке тартылды.
