Қызылордадағы жасөспірім өлімі: даулы видеодағы әйелдің қылмысқа қатысы бар ма
ҚЫЗЫЛОРДА. KAZINFORM – Қызылорда қаласында 14 жастағы жасөспірімнің қаза табуына қатысты бейнежазба кейіпкері күтпеген мәлімдеме жасады.
Айтуынша, әлеуметтік желі қолданушылары талқылап жатқан бейнеүзінді туралы ақпарат шындыққа жанаспайды және оның қайғылы оқиғамен тікелей байланысы жоқ. Жазба мүлдем басқа уақытта түсірілген және бұл мәселе толық шешілген.
- Иә, ол оқиға 4 қазан күні болған. Өзара жанжалдасып қалғанымыз рас. Бірақ артынан ата-анасының рұқсатымен бір-бірімізбен келісімге келгенбіз. Ол кезде іс жабылған болатын. Бұл бейнежазбаның 21 қазандағы баланың өліміне ешқандай қатысы жоқ, - деп мәлімдеді азаматша.
Сонымен қатар ол қайғылы оқиға күні мүлдем басқа жерде болғанын және оған ешқандай қатысы жоқ екенін алға тартты.
- Мен ол күні, яғни 21 қазанда мүлдем жұмыста болған емеспін. Үйде, балаларымның қасында болдым. Сондықтан бұл видеоны баланың өліміне қатыстырмауды сұраймын. Менің бұл баланың өліміне ешқандай қатысым жоқ, – деп түсіндірді ол.
Жергілікті заң компаниясы да бұл бейнежазбаның өкінішті оқиғадан 17 күн бұрын түсірілгенін және материалдар бұрын әкімшілік сотта қаралғанын растап отыр.
- Қандай да бір тұлғаның қылмысқа қатыстылығы туралы дәлелденбеген тұжырымдар жасаудан сақ болуға шақырамыз. Қылмыстық іс бойынша түпкілікті құқықтық бағаны тек уәкілетті органдар мен сот береді, - делінген компания таратқан хабарламада.
Еске салайық, марқұмның әпкесі бұған дейін қайғылы оқиғадан бір апта бұрын бауыры жұмыс беруші әйел ұрып-соққанын айтып, сол жағдайға қатысты видео әлеуметтік желіде таралғанын мәлімдеді.
Полиция кәмелетке толмағанның абайсызда өліміне әкеп соққан қасақана ауыр дене жарақатын келтіру дерегі бойынша қылмыстық істі тергеп жатыр.
