КҚК дрон шабуылынан кейін мұнай айдау станциясын қалпына келтіріп жатыр

АСТАНА. KAZINFORM – Қазіргі уақытта Каспий құбыр консорциумы (КҚК) «Кропоткинская» мұнай айдау станциясында (МАС) қалпына келтіру жұмыстарын жүргізіп жатыр. Бұл туралы Kazinform агенттігіне компанияның баспасөз қызметі хабарлады.

Ресей Қорғаныс министрлігінің мәліметінше, 2025 жылғы 24 наурызда түнгі сағат 2.00 шамасында әуе шабуылына қарсы қорғаныс жүйесі Краснодар өлкесіндегі «Кропоткинская» станциясына бағытталған дрон шабуылын тойтарған. Алайда, атып түсірілген дронның сынықтары «Кавказская» теміржол станциясы маңына құлаған.

- 2025 жылғы 17 ақпанда «Кропоткинская» станциясына жеті дрон арқылы жаппай шабуыл жасалған болатын. Олар жарылғыш заттармен қатар металл сынықтарымен де жабдықталған, – делінген КҚК хабарламасында.

Компанияның баспасөз қызметі 2025 жылғы 19 наурызда бірнеше дронның «Кавказская» мұнай айдау станциясына да шабуыл жасағанын растады. Бұл станция арқылы КҚК құбыр жүйесіне мұнай жеткізіліп, кейін теңіз терминалына жөнелтілетін.

«Кавказская» станциясы арқылы ай сайын кемінде 130 мың тонна мұнай тасымалданады. 2024 жылы бұл көрсеткіш 1,51 млн тоннаны құрады.

КҚК мәліметінше, «Кропоткинская» станциясы тоқтағаннан кейін жылдық тасымал көлемі қысқарған. Ал «Кавказская» станциясы толық жойылғандықтан, оның қызметі жақын арада қалпына келмейді.

Қазіргі уақытта КҚК «Кропоткинская» станциясында жөндеу жұмыстарын жалғастыруда.

Бұған дейін Қазақстанның Энергетика министрлігі КТК-ға жасалған шабуылдарға қатысты пікір білдірген еді.