КҚК жасалған дрон шабуылы: Қазақстан мәселені Украинамен талқылайды

АСТАНА. KAZINFORM — Қазақстанның Сыртқы істер министрлігі Каспий құбыр консорциумының мұнай айдау стансасына жасалған дрон шабуылына қатысты түсінік берді.

— Қазақстан экономикасы үшін өте маңызды мәселе және біз әрине бұл жағдайды украиналық серіктестерімізбен дипломатиялық арналар арқылы талқылайтын боламыз, — деді Сыртқы істер министрлігінің ресми өкілі Айбек Смадияров агенттік тілшісімен ұялы телефонмен хабарласу арқылы.

Айта кетсек, 17 ақпанда Каспий құбыр консорциумының «Кропоткинская» мұнай айдау стансасына дронмен шабуыл жасалды. 

Осыдан кейін еліміздің Энергетика министрлігі Қазақстан мұнайы үшін КҚК тарапынан еш шектеу жоқтығын, мұнайды қабылдау штаттық режимде жүзеге асырылып жатқанын мәлімдеген еді.

Алайда, ресейлік «Транснефть» компаниясының ресми сайтында бүгін жарияланған ақпаратта Қазақстан тарапынан мұнай айдау көлемінің қысқаруы мүмкін екендігі айтылады. 

Кейін азаматтық нысандарына шабуыл жасау фактісі бойынша қылмыстық іс қозғалды. 

Кеше Энергетика министрлігі Каспий құбыр консорциумы арқылы мұнай айдауда шектеу жоқтығын жеткізді.