КҚК жасалған дрон шабуылы: шығынды кім өтейді

АСТАНА. KAZINFORM – Каспий құбыры консорциумына келген шығын кәсіпорынның өз есебінен өтеліп жатыр. Бұл туралы Энергетика министрі Алмасадам Сәтқалиев мәлім етті.

- Дипломатиялық арна арқылы қалпына келтіру мәселелері бойынша консультация жүргізілді. Қазіргі уақытта шығынды өтеу жұмыстары кәсіпорынның өз есебінен жүргізіліп жатыр, - деді Алмасадам Сәтқалиев ведомствоның кеңейтілген алқа отырысынан кейін өткен баспасөз мәслихатында. 

Сондай-ақ министр консультациялық жұмысқа, яғни КҚК-ға келген шығынды анықтауға қазақстандық мамандардың да қатысқанын айтты. 

- Жалпы, кәсіпорынның зақымдануы туралы есеп ұсынылды, ол қазақстандық тарап және акционерлермен келісілді. КҚК-ның тұрақты жұмысын қамтамасыз ету үшін шамамен 1 миллион тонна мұнай сақтайтын ірі резервуар бар. Бүгінде қазақстандық мұнайды қабылдау шектеусіз жүріп жатыр, ол үшін бірқатар шешім қабылданды. Жүк тиеу белгіленген уақытта, ал танкерлерді толтыру бекітілген кесте бойынша жүзеге асырылып жатыр, - дейді ол. 

Бұған дейін Қазақстанның Сыртқы істер министрлігі Каспий құбыр консорциумының мұнай айдау стансасына жасалған дрон шабуылына қатысты Украинамен талқыланатыны туралы мәлімдеген еді. 

Айта кетсек, 17 ақпанда Каспий құбыры консорциумына дронмен шабуыл жасалды.