ҚМДБ биылғы жылды Дін мен дәстүр жылы деп жариялады - Бас мүфти
«Өздеріңіз білесіздер, Қазақстан мұсылмандары діни басқармасы биылғы жылды Дін мен дәстүр жылы деп жариялаған. Өткен жылы да көптеген ауызашарлар өзіміздің қазақы дәстүрімізбен байланыстырылып өткізілді. Биыл да Құдай қаласа, осы үрдістен жаңылмаймыз. Біз өзіміздің діни танымымызды салт-дәстүрімізбен байланыстыруға тырысып жатырмыз. Бүгінгі таңда қандай да бір іс-шара өткізілсе, өзіндік бір қазақи дәстүрі қалыптасып келе жатыр», - дейді Е. Малғажыұлы.
Дінбасының айтуынша, Рамазан айы кезінде ең басты назарға алатын жайт - қалталы азаматтарды су басқан елді мекендердегі үйсіз-жайсыз қалған адамдарға мейлінше көмектесуге шақыру. «Құдай қаласа, мұның барлығын ұйымдастыратын жергілікті имамдар болады. Жалпы биылғы оразаға үлкен дайындықпен кіргелі отырмыз», - дейді Ержан қажы.
Алдын ала мәлімет бойынша, биылғы пітір-садақаның мөлшері 200 теңге деп белгіленген. Сонымен қатар, әр жерде сәресі мен ауызашардың уақыттары әртүрлі болуына байланысты, бүгінгі Төралқа мәжілісінде осы мәселе жан-жақты талқыланып, әр өңірдің сәресі мен ауызашар уақыттары белгіленетін болады.
Сонымен қатар ол жиын барысында жаңа үлгі бойынша өкіл имамдардың, қалалар мен ауылдар имамдарының шапандары бір-бірінен өзгеше болатынына тоқталды. «Имамдар киетін шапандардың үлгісіне келетін болсақ, өздеріңіз білесіздер, бұрынғы Бас мүфти Әбсаттар қажы да шапанның бірізді үлгісін шығарған. Дегенмен, олар әртүрлі тігін орындарында тігілгендіктен, түстерінде аздаған айырмашылықтар болды. Бүгінгі таңда біз бір ғана тігін орнымен келісіп, шапан үлгісін аздап өзгертіп, қазақтың оюларын көбірек қосып шығарайық деп жатырмыз. Сонымен қатар, өкіл имамдардың шапаны бөлек болады, қалалар мен ауылдар имамдарының да шапандары бір-бірінен өзгеше болады», - деп атап өтті Бас мүфти. Айта кетейік, биыл ораза 18 маусымда басталады.