Көгалдағы хоккей: ҚР әйелдер құрамасы Азия ойындарына жолдама алды

АСТАНА. ҚазАқпарат - Қазақстанның әйелдер құрамасы көгалдағы хоккейден үстіміздегі жылғы тамыз айында өтетін жазғы Азия ойындарына жолдама ұтып алды, деп хабарлайды ҚазАқпарат ҚР Ұлттық Олимпиада комитетіне сілтеме жасап.

Индонезияда өтетін жазғы Азия ойындарында Қазақстан намысын 15 спортшы қорғайтын болады.

Қазақстан құрамасы Азия ойындарының жолдамасын алу үшін Таиландтың Бангкок қаласында Қытайлық Тайпей, Гонконг, Сингапур, Пәкістан, Индонезия және Таиланд командаларымен күш сынасты. Онда өз тобында төртінші орынды алып, жазғы Азия ойындарына қатысу құқығын жеңіп алды.

Іріктеу барысында қазақстандық хоккейші қыздар Пәкістан, Индонезия және Таиланд құрамаларын ойсырата жеңді. Алайда, Сингапур мен Гонконгқа есе жіберіп, Қытайлық Тайпеймен тең түсті.

«Шыны керек, лицензиялық турнир біз үшін өте қолайсыз уақытта ұйымдастырылды. Азия елдерінің басым бөлігінде ауа температурасы жоғары екенін білесіздер. Сол себепті, көптеген мемлекеттер үшін жарысты қыста ұйымдастырған ыңғайлы. Ал алты ай бойы қыс құрсауынан шықпайтын Қазақстан үшін бұл көптеген ыңғайсыздықтар тудырды. Турнирге дайындалу үшін даладағы алаңымызда жаттығу керек. Күннің суығына қарамастан қар үстінде жаттығып, жолдамаға қол жеткіздік», - дейді Көгалдағы хоккей федерациясының бас хатшысы Серік Калымбаев.

Бас хатшы қолайсыздықтарға қарамай, жолдама жеңіп алған ойыншылардың шеберлігі мен тәжірибесіне үлкен үміт артатынын айтады. Турнир барысында Қазақстан құрамасының таиландық спортшыларды ірі есеппен жеңуі біздің ойыншыларды жігерлендіре түскен.

«Елімізде көгалдағы хоккей мектебінің мықты болғанын білесіздер. Бірақ спорттың бұл түрі аса танымал болмағандықтан, дамуымыз аздап тежелді. Кезінде біз қарсылас санамайтын командалардың өзімізді ұтып кеткен сәттері көп болды. Бүгінгі хоккей бір орында тұрған жоқ. Сол үшін, күн сайын шыныға түсуіміз керек. Көптеген елдер хоккейді дамыту үшін шетелден кәсіби мамандар шақыртуда. Біздің ел де спорттың бұл түріне оң көзқарас танытып отыр», - дейді Серік Калымбаев.

Қазақстанда көгалдағы хоккейге қызығатын жас жеткіншектер саны көбейіп жатыр. Спорттың бұл түрінен үйірмеге жазылатын жастардың көбеюі бапкерлер мен федерация өкілдерінің болашаққа деген сенімін арттыруда. Әсіресе, Талдықорған қаласында бұл спортпен шұғылданатындардың қатары мол.

Маусым айында көгалдағы хоккейден Қазақстанның әйелдер құрамасы Талдықорғанда оқу-жаттығу жиындарын өткізеді.