Қоғамнан оқшаулаумен байланысты емес жазаларды орындау - айрықша назарда

АСТАНА. Маусымның 3-і. ҚазАқпарат /Ғалымжан Хасенов/ - Бүгін Тараз қаласында қылмыстық-атқару инспекциясы қызметкерлерінің екікүндік семинар-кеңесі өз жұмысын бастайды. Бұл туралы ҚазАқпаратқа Әділет министрлігінің Қылмыстық-атқару жүйесі комитетінен хабарлады.

Комитеттің қылмыстық-атқарушы инспекцияларына жетекшілік жөніндегі басқарманың бастығы Дидар Атантаевтың айтуынша, бұл шара Қазақстан Республикасының 2010-2020 жылға дейінгі Құқықтық саясат тұжырымдамасын жүзеге асыру аясында өткізілгелі отыр.

Бұл семинардың мақсаты - соңғы өзгертулерді ескере отырып, қоғамнан оқшаулаумен байланысты емес жазаларды орындау жөніндегі заңнамалар мен нормативтік-құқықтық актілерді түсіндіру және оларды жер-жерлерде дұрыс қолдануы бойынша тәжірибе алмасу болып табылады.

Семинарға Алматы, Оңтүстік Қазақстан, Қызылорда және Жамбыл облыстарының қылмыстық-атқару жүйесі қызметкерлерімен қоса, Бас прокуратура жанындағы Құқықтық статистика комитетінің, Жамбыл облысы әкімдігінің, аймақ прокуратурасы мен ішкі істер департаментінің өкілдері қатысады.