Қоқыс әкеліп, балмұздақ ал: Кентауда «Таза Қазақстан» бағдарламасы жаңа форматта өтіп жатыр
ТҮРКІСТАН. KAZINFORM - «Таза Қазақстан» экологиялық бағдарламасы аясында Кентау қаласында сенбіліктер жаңашыл әрі қызықты форматта өтуде.
Сенбілік жұмыстарына қаладағы 30-ға жуық мекемеден 500-дей қызметкер, еріктілер мен тұрғындар белсене қатысты. Нәтижесінде 12 арнайы техника арқылы 50 тоннаға жуық қоқыс қала аумағынан шығарылды.
Бұл шара тек сенбілікпен шектелмей, жас ұрпаққа табиғатты аялауды үйрететін жарқын бастама болды. Аулалар күл-қоқыстан тазартылып, жабайы шөптерден арылды. Балалар да бұл іске белсене атсалысты.
Іс-шараның ең ерекше тұсы – плогинг форматындағы экологиялық акция болды. Балалар мен жастар белсенді түрде қатысып, әрбір әкелген қоқыс үшін балмұздақ алды.
Айта кетейік, бұдан бұрын Түркістан облысында қоқыс жинаудан жарыс өткенін жазған болатынбыз.
