Қоқыс өңдеу саласында 316,9 млрд теңгенің 67 жобасы мақұлданды

АСТАНА. KAZINFORM – Елімізде қоқыс өңдеу саласында құны 316,9 млрд теңге болатын 67 жоба мақұлданды. Бұл туралы Экология және табиғи ресурстар министрі Ерлан Нысанбаев айтты.

— Мемлекет басшысының ірі қалаларда қоқыс өңдеу зауыттарын салу жөніндегі тапсырмасын іске асыру үшін утильтөлем есебінен жеңілдетілген қаржыландыру механизмі бекітілді, жылдық 3 процентпен 15 жылға және екі жылға дейінгі демалыспен несиелер көзделген. Бүгінгі күні министрлік әкімдіктер ұсынған құны 316,9 млрд теңге болатын 67 жобаны мақұлдады, оның ішінде 43 жоба қайта өңдеуге бағытталған, — деді ол.

Министрдің айтуынша, 67 жобаның ішінде құны 47,3 млрд теңге болатын 9 жобаны Өнеркәсіпті дамыту қоры мақұлдады, оның 6-ауы 4,1 млрд теңгеге қаржыландырылды.

— 3 жоба бойынша инвесторларды қаржыландыру үшін келісімшарт жасақталып жатыр. Құны 39,9 млрд теңге болатын 15 жоба бойынша Өнеркәсіпті дамыту қоры сараптамаларды аяқтау сатысында. Қалған 43 жоба бойынша инвесторлар Өнеркәсіпті дамыту қорының ескертулерін пысықталып жатыр, — деп түйді сөзін ведомство басшысы.

Айта кетелік Премьер-министр Олжас Бектенов елімізде қалдықтарды басқару инфрақұрылымын дамыту мәселесі сол күйі толық шешімін таппағанын сынға алған еді.