Көкшетауда көмір қоры жеткілікті ме

КӨКШЕТАУ. KAZINFORM – Көкшетаудағы «Көкшетау жылу» коммуналдық кәсіпорнында екі айлық қор, яғни 40,7 мың тонна көмір бар. 

Қала әкімдігінің мәліметінше, қазіргі кезде өңірде жылыту маусымы алдында көмір жеткізу жұмыстары қызу қолға алынған.

«Көкшетаудағы «Көкшетау жылу» коммуналдық кәсіпорнында екіайлық қор, 40,7 мың тонна көмір бар. Қазіргі кезде, қажеттілік жоспарына сәйкес көмір разрездерін өтінімдермен қамтамасыз ету бойынша жұмыстар жүргізіліп жатыр», - деп түсіндірді қалалық әкімдіктің баспасөз қызметінен.

Жалпы, Ақмола облысы бойынша алдағы жылыту маусымына жалпы 1 млн 378 мың тонна көмір қажет. Оның 465 мың тоннасы коммуналдық-тұрмыстық қажеттіліктерге, 913,5 мың тоннасы тұрғындар үшін.

Бүгінгі таңда облыс орталығының тұйықтарында 8 400 тонна көмір бар болса, оның 2 400 тоннасы «Шұбаркөл» көмірі. Бұл көмірдің бағасы – 18 100 - 18 200 теңге шамасында сатылып жатыр. Бұған қоса, 5 100 тонна «Қаражыра» және 900 тонна «Майқұба» көмірі бар. «Қаражыра» көмірінің тоннасы 18 500 - 18 700, «Майқұба» көмірі 14 000 - 18 500 теңгеден.

Айта кетсек, бұдан бұрын Көкшетауда жылыту маусымы басталғанын жазған едік.