Көкшетауда түнімен жауған жаңбыр аралас қар кептелістер туындатты

КӨКШЕТАУ. ҚазАқпарат - Көкшетауда алғашқы қар түсті. Түнде басталған жаңбыр аралас қар таңға дейін қаланы ақ ұлпаға көмкеріп тастады.

Қазір ауа температурасының көрсеткіші 1 градусты көрсетіп тұр. Осының салдарынан қалада тұрғындардың жүріп-тұруы мен көлік қатынасы қиындады, деп хабарлайды ҚазАқпарат тілшісі.

Қар еріп, үлкен шалшық сулар пайда бола бастаған жолдарда көлік кептелістері туындады.

Синоптиктер түнде ауа температурасы минус 6 градусты көрсететіндігін болжауда. Егер болжам расталса таңертең қала көшелерінде көктайғақ болуы ықтимал.