Көкшетауда «Жастар - Отанға!» партиялық жобасы аясында 89 адамға маммолог дәрігер тегін көмек көрсетті (ФОТО)
«Кеңес Орталығы» консалтинг орталығында ұйымдастырылған бұл жолғы шараның мақсаты халық арасында салауатты өмір салтын насихаттау, жұмысшы және ауыл жастарына медициналық кеңес беру болып табылады. Акция барысында күні бойы облыс және қала тұрғындары маммологтың тегін кеңесіне жүгініп, маммография өту мүмкіндігіне ие болды. Оған қоса орталық қалалық емхана терапевтері қабылдау өткізді. « Мұндай акция алғаш рет өткізіліп тұрған жоқ. Дегенмен, «Кеңес Орталығында» өтетін барлық медициналық тесерулер халықтың көңілінен шығады. Сол себепті де халықтың қарасы көп болып отыр», дейді орталық консультанты Сымбат Үсен. Ал, «Шипагер» жастар денсаулығы орталығының жетекшісі Кенжегүл Исмагулованың айтуынша, сүт безі қатерлі ісігі Қазақстандағы әйелдер арасында онкологиялық аурулардың ішінде бірінші орын алады. «Осындай шаралар арқылы әйелдерге маммолог тексерістерінің жүйелілігі маңызды екені туралы хабар таратқымыз келеді. Тексерісті жылына бір рет өткен жөн», -дейді ол. Жалпы, бұл күні барлығы 89 адам дәрігерге қаралды. Олардың барлығына мамандар тарапынан ақыл-кеңес берілді.