Қолғапты ауыстырмаған: Ақтөбеде ата-аналар шағымы тексеріліп жатыр
АҚТӨБЕ. KAZINFORM – Ақтөбеде ата-аналар балаларын мектептің мәжіліс залына жинап, медициналық тексеруден өткізген ұжымның әрекетін сынға алды. Қазір қызметтік тексеру басталды.
Ақтөбедегі №14 мектепте медициналық тексеру жүргізілді. Ата-аналардың мәліметіне сүйенсек, тексеру мәжіліс залында өткен. Ер балаларды жыныс мүшесін тексеру кезінде дәрігерлер резеңке қолғапты ауыстырмаған, сонымен бірге қыздарды да ер дәрігер қарап шыққан.
Осы оқиғадан кейін Ақтөбе облыстық денсаулық сақтау басқармасы қызметтік тексеру басталғанын хабарлады.
- 5 ақпан күні №14 мектепте медициналық тексеру жүрді. Медициналық тексерудің болатыны туралы алдын ала хабар берілді, ата-аналары да біледі. Ал медициналық тексеруге арналған орынды мектеп әкімшілігі белгіледі. №14 орта мектепте 3, 4 және 8 сыныптың 98 оқушысы тексерілді. Тексеру жүргізгендер арасында балалар хирургі де болды. Маманның айтуынша, әр баланы қараған кезде медициналық қолғапты ауыстырып отырған. Айтып өтейік, медициналық тексеруге қажетті қолғап пен зарарсыздандыру құрылдары бар, дәрігерлер қажетті заттармен қамтылған. Осы оқиғадан соң облыстық денсаулық сақтау басқармасында ішкі тексеру басталды. Оның қорытындысы туралы ата-аналарға жазбаша хабарланады, - деп хабарады облыстық денсаулық сақтау басқармасының баспасөз қызметі.
Айта кетейік, мұндай медциналық тексеру кезінде балалардан қан алмайды, қандай да бір вирус жұқтыру қаупі мейлінше төмен. Арнайы бөлмені де талап етпейді. Тек балалар үшін бөлменің ауа температурасы қалыпты болуы тиіс.
- Медициналық бақылаудан өту кестесі «Ақтөбе қаласының білім бөлімі» ММ-мен келісіледі. Мектеп тарапы медициналық бақылау жүргізетін орынды қамтамасыз етіп, ата-аналарды хабардар етеді. Ал медициналық комиссия мен бақылаудың сапасына медициналық мекеме жауапты,- деп хабарлады Ақтөбе қалалық білім бөлімінің басшысы Латып Әліби.
Бұған дейін хабарлағанымыздай, Мұғалжар ауданындағы Самал бөбекжай-бақшасындағы балалардың таңғы асынан қоңыз табылды.
