Жамбыл облысында 16 адамды кене шаққан

АСТАНА. KAZINFORM – Зардап шеккендердің барлығы бақылауға алынып, 2 апталық карантинге жіберілді.

Кене маусымы күн жылынғаннан басталып, қарашаға дейін созылады. Олардың шағуы адам денсаулығына қауіпті болуы мүмкін. Кене арқылы таралатын аурулардың бірі – Конго-қырым геморрагиялық қызбасы. Бұл өте қауіпті жұқпалы ауру қарқынды қан кетумен сипатталады және өлім деңгейі жоғары.

- КҚГҚ вирусының негізгі тасымалдаушылары – иксодты кенелер, олардан инфекция кене шаққанда немесе оны езгенде, малды кенеден қорғалмаған қолмен тазартқанда, жүн қырқылғанда және КҚГҚ бар науқасты күту процесінде жұқтырылады. Табиғат аясында демалып жүргенде де конго-қырым геморрагиялық қызбасы вирусын жұқтыруыңыз мүмкін, - деп баяндады Жамбыл облысы әкімдігінің санитарлық-эпидемиологиялық қадағалау басқармасы басшысының орынбасары Неили Муликова.

Конго-қырым геморрагиялық қызбасы ошақтар арқылы таралады, Жамбыл облысында мұндай 46 нүкте есептелген: Мойынқұм ауданында – 13 елді мекен, Талас ауданында – 8, Сарысу ауданында – 12, Жамбыл және Байзақ аудандарында – 2, Шу ауданында – 8 және Тараз қаласында – 1. 

Нейли Муликова атап өткендей, 2024 жылы облыста КҚГҚ вирусына шалдығудың 2 жағдайы тіркелген, ағымдағы кезеңде тіркелген жағдайлар болған жоқ.

- Халық арасында аурудың алдын алу және эпидемиялық маусымды болжау мақсатында зоологиялық-паразитологиялық топ ағымдағы жылдың наурыз айынан бастап көктемгі далалық барлау жұмыстарын жүргізіп жатыр. Бүгінде облыста 11 мыңнан астам кене үлгілері жиналды, 792 сынама зерттелді, соның ішінде 27 сынамадан КҚГҚ вирусы анықталды, - деп атап өтті ол.

Ашық ауада демалу кезінде өзіңізді КҚГҚ инфекциясынан қорғау үшін қарапайым қауіпсіздік ережелерін сақтау керек. Табиғатта серуендеу кезінде жеңі ұзын ашық түсті киімдерді киіп, шалбарды шұлықтың ішіне тығып алу керк. Жануарларды жаю және қырқу алдында малды және үй-жайларды кенеге қарсы препараттармен өңдеу керек. Малды күту кезінде қорғаныш киімін, қосымша қолғап пен қорғаныш көзілдірік киіп, беттің ашық жерлерін маскамен жабу қажет. 

Егер сіз КҚГҚ инфекциясына шалдыққан науқаспен байланыста болсаңыз, сізді шағып алған болса немесе кене қаны дененің ашық жерлеріне, әсіресе шырышты қабатқа тиіп кетсе дереу медициналық ұйымның көмегіне жүгіну керек. 

Вирустың таралуын тоқтату және инфекцияның алдын алу үшін кенені мүмкіндігінше тез алып шығу керек. Оны пинцетпен ұстаңыз. Тым қатты қыспай (жәндікті езіп алмау үшін), оны баяу және мұқият тартып алыңыз. Орнын спиртпен сүртіңіз. Алынған кенені ыдысқа салып, оны қақпақпен мықтап жабыңыз және емдеу-алдын алу мекемесіне хабарласыңыз.

Бұған дейін Түркістан облысында мыңнан астам адамды кене шаққанын жазған болатынбыз.

Қызылордада кене шаққан 11 адам дәрігер көмегіне жүгінді. 

Шығыс Қазақстан тұрғындарын да кене шаға бастады.