Қонаев қаласында жаңа саябақ пайда болады
ҚОНАЕВ. KAZINFORM – Алматы облысының орталығы Қонаевта жалпы аумағы 6527 м² болатын сквер ашылады.
Қала әкімдігінің мәліметінше, Қойшыманов көшесінде жаңа қоғамдық кеңістікті абаттандыру жұмыстары басталды. Жоба аясында газон төсеу, автоматты суару жүйесін орнату, сәндік ағаштар мен көпжылдық өсімдіктер отырғызу, орындықтар, әткеншектер орналастыру көзделген.
— Кеңістік экологиялық, функционалдық және эстетикалық талаптарға сай жасақталады. Мұндағы басты нысан — «Өмір ағашы» атты арт-нысан болмақ. Ол Алтын адам киім үлгілерінің элементтері бейнеленген тас құрылым түрінде орындалады. Қасында осы бейнелердің тарихи маңызын баяндайтын QR-код орнатылады, — деп хабарлады Қонаев әкімдігі.
Сонымен қатар сквер мүмкіндігі шектеулі азаматтарға қолжетімді болмақ. Мұнда жаяу жүргінші жолдары, фото-аймақтар, қоршау мен аркалық құрылымдар да жасалады.
Еске салайық, Алматыда Президент резиденциясының орнындағы саябақ құрылысына 2,2 млрд теңге жұмсалатынын жазғанбыз.
