Конференция лигасы: «Челси» сырт алаңда «Юргорденді» ірі есеппен жеңді

АСТАНА. KAZINFORM - Футболдан UEFA Конференция лигасы жартылай финалындағы алғашқы ойындардың нәтижесі белгілі болды.

Жарыстың аталған сатысында англиялық «Челси» сырт алаңда Швецияның «Юргорден» командасын 4:1 есебімен ойсырата жеңді.

Ойынның 13-минутында олардың қатарынан Джейдон Санчо есеп ашса, одан кейін Нони Мадуэке 43, Николас Джексон 59, 65-минутта мергендік танытты. Ал «Юргорден» сапынан Исак Алемайеху 68-минутта жалғыз гол соқты.

Тағы бір кездесуде Испанияның «Бетис» командасы өз алаңында Италияның «Фиорентина» клубымен шеберлік байқасты. Алғашқы минутта испаниялық команда шабуылға көбірек көңіл бөлді. Нәтижесінде Эз Абде 6-минутта есеп ашып кетті.

Оның әріптесі Антони 64-минутта басымдықты арттырса, оған «Фиорентина» сапынан Лука Раньери 73-минутта бір голмен жауап қайырды.

Осылайша «Бетис» қарсыласынан 2:1 есебімен басым түсті. Енді қарымта кездесу 8 мамырға белгіленген.

Финал 28 мамырда Польшаның Вроцлав қаласындағы «Тарчиньски Арена» стадионында болады.

Еске салсақ, бұдан бұрын UEFA Чемпиондар лигасы жартылай финалында «Барселона» (Испания) мен «Интер» (Италия) тең түсті.