Конференция лигасы: «Ордабасы» алғашқы кездесуінде «Пюниктен» жеңілді

АСТАНА. KAZINFORM - Футболдан Конференция лигасы үшінші іріктеу кезеңінде шымкенттік «Ордабасы» Арменияның «Пюник» командасымен кездесті.

Кездесу барысында командалар тартысты ойын өткізді. Бірінші кезеңде шымкенттік клубтан Владислав Садовский 24-минутта гол соққан еді. Бас төреші аталған голды футболшының ойыннан тыс қалуына байланысты санаған жоқ.

Екінші кезеңде қарсыластар бір-бірінің қақпасы маңында жиі бой көрсетті. Соған қарамастан командалар таблодағы есепті өзгертуге қолы жетпей жатты. Ойынның 56-минутында «Пюник» сапынан Юсуф Отубанджо қақпадан саңылау тауып кетті.

Өз қақпасына гол жіберіп алған «Ордабасы» таразы басын теңестіруге ұмтылды. Алайда дегеніне жете алған жоқ.

Осылайша «Ордабасы» қарсыласына 0:1 есебімен жеңіліп қалды.

Енді қарымта ойын 15 тамыз күні өтеді.

Айта кетсек, бұдан бұрын аталған турнирдің екінші іріктеу кезеңінде қазақстандық «Ордабасы» Люксембургтің «Дифферданж-03» командасын қапы қалдырып кетті.

Бүгін 23:00-де «Астана» Конференция лигасы үшінші іріктеу кезеңінде сырт алаңда Румынияның «Корвинул Хунедоара» командасымен шеберлік байқасады.