Конституция күніне орай 27 мың атыраулыққа әлеуметтік көмек беріледі

АСТАНА. KAZINFORM — Былтыр мұндай төлем 25 мың адамға берілді. Бұл туралы өңірлік коммуникациялар қызметі хабарлайды.

Облыста ҚР Конституциясы күніне орай барлық топтағы мүгедектігі бар азаматтарға елу мың теңгелік біржолғы әлеуметтік көмек төлеу жұмыстары жүргізіліп жатыр. 

— Аймақта алты мерекеге орай жекелеген санатқа жататын тұрғындарға түрлі көлемде біржолғы әлеуметтік төлемдер беріледі. Атап айтқанда, 1 мамыр — Қазақстан халқының бірлігі күні, 7 мамыр — Отан қорғаушылар күні, 9 мамыр — Жеңіс күні, 30 тамыз — Конституция күні, 25 қазан — Республика күні және 16 желтоқсан — Тәуелсіздік күніне орай облыс тұрғындарына әлеуметтік төлемдер жыл сайын беріледі, — деді облыстық Жұмыспен қамтуды үйлестіру және әлеуметтік бағдарламалар басқармасының бас маманы Жаңылсын Сейдалиева.

Бұдан бұрын елордадағы Тұңғыш Президент музейінде Конституция күні қарсаңында ерекше көрме ашылғанын жаздық.