Концерт, ойын-сауық: Астана тұрғындарын 28 желтоқсан күні не күтіп тұр

АСТАНА. KAZINFORM — Елорда әкімдігі жаңа жылдық көңіл-күйге бөленіп, қысқы демалысты қай жерде көңілді өткізуге болатыны туралы хабарлады.

Астанадағы қысқы серуенге, сырғанаққа арналған орындар тізімі жарияланды
Фото: Астана әкімдігі

Елорданың әр жерінде сырғанақтар, мұз айдындары, безендірілген шыршалар, жаңа жылдық жәрмеңкелер, шағын архитектуралық формалар, концерттік бағдарламалар, фотоаймақтар және т. б. тұрғындардың қуанышына айналады. 

28 желтоқсанда Астананың бес негізгі орнында қазақ эстрадасының жұлдыздары мен шығармашылық топтарының қатысуымен мерекелік бағдарламалар, жаңа жылдық сыйлықтары бар интерактивті және спорттық ойындар, балаларға арналған бағдарлама, спорт мектептері оқушыларының қойылымдары және тағы басқалар өтеді.

Осылайша, Нұра ауданындағы «Астана Арена» стадионының автотұрағында мерекелік көңілді кеш 12.00-де басталып, 21.00-ге дейін жалғасады. Жұртшылық арқан тартыс, қаппен жүгіру, коньки тебу, мәнерлеп сырғанаудан мастер класс, жүлделі эстафеталар және концерттік бағдарламамен бірге көңілді старттарды тамашалай алады.

Нұра ауданы
Фото: Астана әкімдігі

Есіл ауданының ЭКСПО аумағында сағат 16.00-ден 18.00-ге дейін мерекелік бағдарлама өтіп, көрермендерге шайбалы хоккейден шеберлік сыныбы, жүлделі спорттық эстафеталар мен концерттік бағдарлама ұсынылады.

Есіл ауданы
Фото: Астана әкімдігі

Сарайшық ауданындағы «Қазақ елі» монументі жанындағы алаңда мерекелік көңілді кеш сағат 14.00-де басталады. Іс-шара қонақтары көңілді старттарға қатысып, жүлделер ұтып ала алады, эстрада жұлдыздары мен шығармашылық ұжымдардың қатысуымен концерттік бағдарлама сағат 18.00-ден 20.00-ге дейін өтеді.

Сарайшық ауданы
Фото: Астана әкімдігі

Сарыарқа ауданындағы қалалық алаңда (елорда әкімдігінің алдында) жаңа жылдық бағдарлама сағат 12.00-ден 14.00-ге дейін өтеді. Қала қонақтары мен тұрғындары үшін шайбалы хоккейден шеберлік сыныбы мен концерттік бағдарлама ұйымдастырылады.

Сарыарқа ауданы
Фото: Астана әкімдігі

Алматы ауданының Тәуелсіздік даңғылы бойындағы Оқушылар сарайының аумағында сағат 12.00-13.00 аралығында балалар шығармашылық ұжымдарының қатысуымен концерттік бағдарлама өтеді.

Алматы ауданы
Фото: Астана әкімдігі

Естеріңізге сала кетейік, аталмыш орындарда жаңа жылдық жәрмеңкелер, сырғанақтар, мұз айдыны және т. б. жұмыс істейді.

Бұған дейін хабарлағанымыздай, елорда полициясы жаңа жылда аяз ата, ақшақар шақырғанда сақ болуды ескертті.

Соңғы жаңалықтар