Қорғас кеден бекеті автокөлік экспортынан рекордтық көрсеткішке қол жеткізді - шетелдегі қазақ баспасөзі
Kazinform ХАА шетелдегі қазақ тілінде тарайтын ақпарат көздеріне апталық шолуын ұсынады.
Өзбекстан мен Қазақстан ауыл шаруашылығы саласындағы ынтымақтастық кеңейеді – ӨзА
Өзбекстан Республикасының Ауыл шаруашылығы министрі Иброхим Абдурахмонов Қазақстан Республикасының Өзбекстандағы Төтенше және Өкілетті елшісі Бейбіт Атамқұловпен кездесу өткізді. Бұл туралы «ӨзА» ақпарат агенттігі мәлімдеді.
Хабарламада айтылғандай, кездесуде екі бауырлас ел арасындағы одақтастық қатынастарды одан әрі нығайту, ауыл шаруашылығы саласындағы ынтымақтастықты кеңейту және бұрын жүзеге асырылған жобаларды жеделдету мүмкіндіктері талқыланды.
Әңгімелесу барысында екіжақты қарым-қатынастың дамуында белгілі бір жетістіктерге қол жеткізілгенімен, іс жүзіндегі ынтымақтастықты кеңейту үшін әлі де үлкен мүмкіндіктер бар екені атап өтілді. Сондай-ақ ауыл шаруашылығы саласындағы келісімдерді жүзеге асыру, ғылымды дамыту және жаңа жобаларды бастау мәселелері бойынша пікір алмасты.
- Кездесуде аграрлық саладағы әріптестікті жаңа деңгейге көтеру, атап айтқанда, астық өнімдері мен мал шаруашылығын дамыту, сондай-ақ екі елдің ауыл шаруашылығы мамандарының тәжірибе алмасу мүмкіндіктері талқыланды, - деп жазады «ӨзА».
Сондай-ақ осы аптада «ӨзА»-да «Қазақ ұлттық өнер университетінің магистранттары Өзбекстанда біліктілігін арттырды» деген тақырыптағы ақпарат жарияланды.
Аталған ақпарат көзінің дерегінше, Қазақстан Республикасы Қазақ ұлттық өнер университетінің магистранттары Камолиддин Бехзод атындағы Ұлттық бейнелеу өнері және дизайн институтының «Өнер тарихы және теориясы» және «Монументалды кескіндеме» кафедраларында біліктілігін арттыру бағдарламасына қатысты.
Магистранттар тағылымдама барысында институттағы ғылыми-зерттеу ортасымен, профессор-оқытушылар құрамының тәжірибесімен, сондай-ақ өнер саласындағы заманауи әдістер мен оқу үдерісіндегі инновациялық технологиялардың қолданылу жолымен жақын танысу мүмкіндігіне ие болды.
- Тағылымдаманы сәтті аяқтағаны үшін Қазақ ұлттық өнер университетінің магистранттары Бақыт Жұраев, Сержан Камунов, Елена Мареева, Жанеля Тасқынбаева және Назерке Шынарбек арнайы сертификаттармен марапатталды, - деп жазады өзбекстандық БАҚ.
Қытайда қандасымыз жеңіл атлетикадан бір аптада екі рет бас жүлде жеңіп алды - CNR
Қытайда тұратын қандасымыз Дина Нұрланқызы жеңіл атлетикадан жабық кешендегі Қытай чемпионатында биіктікке секіру жарысынан бас жүлдені қанжығалады. Бұл туралы Қытайдың «Орталық халық радиосы» хабарлады.
Аталған БАҚ-тың дерегінше, жеңіл атлетикадан жабық кешендегі әйелдер арасындағы биіктікке секіру жарысында Дина Нұрланқызы 1.87 метрлік нәтижемен бас жүлдені қанжығалады. Ол Осыдан бір апта бұрын жеңіл атлетикадан жабық кешенде өткен Ұлттық Гран-при жарысында да 1.87 метрлік көрсеткішпен чемпион атанған болатын.
Дина Нұрланқызы 1,90 метрді бағындыра алатынына сенімді. Ол жаттығуда 1,90 метрден асып кеткенін және келесі жарыстарда өзінің осы межені бағындыруға тырысатынын айтқан.
Айта кетейік, Дина Нұрланқызы 1998 жылы Қытайдың Құлжа ауданының Ойманбұлақ ауылында дүниеге келген. 15 жасында Шыңжаң құрамасына қабылданған. Ол 2021 жылғы жеңіл атлетикадан ұлттық чемпионатта биіктікке секіруден 1,84 метр көрсеткішімен екінші орынды жеңіп алса, 2023 жылғы жеңіл атлетикадан ел чемпионатында бас жүлдені еншілеген. Дина Нұрланқызының бойының биіктігі - 1,87 метр. Ол – Шыңжаңдағы биіктікке секіру спортшылары арасындағы ерекше талант иесі.
Қорғас автокөлік экспортынан рекордтық көрсеткішке қол жеткізді – «Жэньминь жибао»
Былтыр Қорғас құрлықтық шекара бекетінен 420 мың автокөлік экспортталып, тарихтағы ең жоғары рекордты жаңартты, деп хабарлайды Қытайдың «Жэньминь жибао» басылымы.
Аталған БАҚ-тың дерегіне сүйенсек, мемлекет бойынша автокөлік экспорт ететін ең үлкен құрлықтық өткелі ретінде Қорғас кеден бекетінің автокөлік экспорты жоғары көрсеткішке қол жеткізген. Атап айтқанда, 2024 жылы аталған кеден бекеттің экспорт етілген автокөлік 421 мың болып, бұрынғы сәйкес мезгілмен салыстырғанда 38.6% артып, тарихтағы ең жоғары рекордты жаратқан.
«Жэньминь жибаодың» мәліметінше, қазір де Қорғаста экспортты күтіп тұрған автокөліктер көп екені айтылады. Айта кетейік, мұнда жолаушылар автокөліктері, жүкті өзі түсіретін автокөліктер және жаңа энергиялы шағын автокөлік қатарлылары бар.
Қорғас Хаочын халықаралық жүк тасымалы компаниясы директорының айтуынша, биыл компанияның экспорты артқан. Қытайдағы көптеген тауар автокөліктерін өндіретін зауыттардан уәкілдік міндет өтеу құқығын алып, шетелде қызмет өтеу пунктін көбейткен. Сол арқылы экспортталған автокөліктерді шетелде жөндеуге болатын болды.
Қазақстан мен Қытай металлургияда ауқымды жобаны іске қосып жатыр – «Халық газеті»
Қазақстан Сыртқы істер министрлігінде Қазақстанда түсті металдарды өндіру және терең өңдеу саласындағы инвестициялық жобаны іске асыру жөніндегі келісімге қол қойылды, деп хабарлайды «Халық газеті» басылымы «DKnews.kz»-ке сілтеме жасап.
Келтірілген деректерге сүйенсек, қол қою рәсіміне Қазақстан Сыртқы істер министрінің орынбасары Әлібек Қуантыров, Қазақстан Өнеркәсіп және құрылыс вице-министрі Олжас Сапарбеков және «East Hope Group» компаниясының бас директоры Чанцзюнь Мэн қатысты.
Сонымен қатар жоба екі өңірде жаңа өндірістік қуат құруды қарастырады. Бұл металлургия саласында озық технологияларды енгізуге және дайын өнімді халықаралық нарықтарға, соның ішінде Еуропалық одақ, Орталық Азия және Қытайға экспорттауды кеңейтуге мүмкіндік береді. Жоба аясында электр қуаты станцияларының құрылысын бастау көзделіп отыр.
Ирандық тұқымның әлемге танымал болуының себебі неде? - ParsToday
Иранның 6-шы Тұқым ғылымы мен технологиясы конференциясы Керманда өтті.
Иранның Ғылым, зерттеу және технология министрі 6-шы Иранның Тұқым ғылымы және технологиясы конференциясына жолдауында қоршаған ортаның өзгерістеріне төзімді модификацияланған тұқымдар өндіру негізінде азық-түлік қауіпсіздігін қамтамасыз ету және соңғы нәтижелер мен заманауи технологиялар арқылы тұқым шаруашылығына инвестиция салуды дамытуды қуаттады, деп жазды ParsToday ақпарат агенттігі.
ParsToday ақпарат агенттігінің мәліметі бойынша, Иранның Ғылым, зерттеулер және технология министрі Хұсейн Симаи жолдауында осы тақырып бойынша пікір білдірген. Оның айтуынша, Иранның заманауи тұқым технологиялары, соның ішінде алдыңғы қатарлы генетика мен селекция, биотехнологиялар және тұқым шаруашылығын ақылды басқару саласындағы ғылыми жетістіктері климаттың өзгеруінің қиындықтарын шешу және ауылшаруашылық өнімділігін арттыру үшін бірегей мүмкіндіктер туғызды.
Ирандық басылым қоршаған ортаның өзгерістеріне төзімді модификацияланған тұқымдар өндіруі туралы шағын мақалада «Иранның тұқым өндірудегі құнды қуаттары», «Иран 5 елге тұқым экспорттайды», «Иранның ауылшаруашылық қауымдастығына 950 жаңа өсімдік және бау-бақша тұқымының сорттарын таныстыру», «Иранда тұқым таситын Технопот өнімін таныстыру» және «Иранның өсімдік өсірудегі жүз жылдық тәжірибесін Суданға беруге дайындығы» деген секілді бірнеше тақырыпқа тоқталған.
Түркі әлемі жас ғалымдар конгресі басталды - TRT
Өзбекстанның астанасы Ташкентте Екінші Халықаралық Түркі әлемі жас ғалымдар конгресі басталды.
ТР Коммуникация басқармасы, Түрік ынтымақтастық және үйлестіру агенттігі, Шетелдегі түріктер және ағайын қауымдастықтар басқармасының қолдауымен Жас ғалымдар одағы екінші рет ұйымдастырып жатқан конгреске 20-дан астам елдің әртүрлі университеттерінің ғалымдары қатысып жатыр.
Бұл туралы осы аптада Түркия Радио Телевизия порталы хабарлады.
«TRT»-ның дерегінше, Ташкент мемлекеттік заң университеті ұйымдастырған «Ортақ болашақтың құрылысы» тақырыбындағы іс-шарада Жас ғалымдар одағының президенті Юнус Коджабыйык сөз сөйледі.
Коджабыйык ғалымдар арасындағы ынтымақтастықты арттыруды мақсат еткен бұл конгрестің бұрын әлемнің маңызды ғылым орталықтарының бірі болған Өзбекстанда өтуіне қуанышты екенін атап өтті.
Кыршехир Ахи Эврен университетінің ректоры Профессор Мұстафа Қасым Қарахожагил де құрылтайдың Өзбекстанда өтіп жатқанына риза екенін айтып, құрылтайдың түркі әлеміне пайдасын тигізуіне тілектестігін білдірді. Карахожагил өз сөзінде университетінің қызметі туралы мәлімет беріп, конгресс аясында Өзбекстан университеттерімен кездесулер өткізіп, ынтымақтастықты дамытқысы келетінін айтты.
