Көрісу мерекесінің мән-маңызын кейінгі ұрпаққа ұғындыра білуіміз қажет – Мақсот Берген
-Мақсот Қабышұлы, Көрісуді Амал мерекесі деп те атайды. Қазақстанның батыс өңірі мен Ресейдің шекаралас аймақтарындағы қазақтардың арасында сақталған ежелгі дәстүр. Осы жөнінде не айтар едіңіз?
-Иә, 14 наурыз – Көрісу мейрамы. Көрісу күнінде қазақ халқы қыстан аман-есен шыққанына қуанып, бір-бірімен қол алысады. Таң атар-атпастан Көрісу мерекесін асыға күтіп отырған әрбір отбасы алдын ала дайындалып қойған дастарханын жаяды. Міндетті түрде бауырсақ пісіріп, дастарханға тәтті тағамдарды үйіп қояды. Отбасының кішілері үлкендеріне қос қолын беріп, көрісіп шығады. Таң ата ауылдың жасы кішілері түгел үй-үйді аралап, сәлем беріп шығады.
Ауылдың үлкендері жастарға міндетті түрде бата береді.
-Халқымызда «Батаменен ел көгерер, Жаңбырменен жер көгерер» деген қанатты сөз бар. Батаның да мән-маңызы ерекше ғой?
-Оған сөз бар ма! Қазақ халқының ұлттық мәдени игіліктерінің ішінде, елдің рухани қазынасында бата сөздерінің мән мағынасы, қадір-қасиеті айрықша бағалы. Өйткені қанымызға сіңісті, жанымызға жұғымды, ой санамызға нұрлы шуақ сыйлап, сілкіндіріп, серпілтетін, марқайтып қанағаттандыратын осынау ақыл, нақыл сөздер – тәрбиенің бастау бұлағы.
Халқымыздың тілек, бата сөздері жеткіншек жас ұрпақты әдепті, сабырлы, зерделі, арлы болып өсуге баулиды, кекшіл емес, кешірімді болуын тілейді, жерін, елін қорғау үшін талапты да ержүрек болып ержетуіне талпынтады.
Бала кезімізде ауылдық жерде ауылдағы үйлерді түгелге жуық аралап, сәлем беріп шығатынбыз, бата алатынбыз. Жасыратын жоқ, балаларға тәтті кәмпит беретін. Осының өзі ерекше қуаныш сыйлайтын.
Саулықтың басы сәлеммен басталады. Жастарымызды еліміздің салт-дәстүрін сақтап, 14 наурыз мейрамы күні үлкендерге сәлем беруді ұмытпауға шақырамын.
-Көрісу мейрамы соңғы жылдары елімізде кеңінен тарала бастады. Қазіргі кезде Батыс өңір ғана емес, Қазақстанның басқа да аймақтарының тұрғындары бұл мерекеден хабардар. Оның аясын кеңейте түсу үшін әлі де қандай іс-шаралар атқару қажет деп ойлайсыз?
-Бір-бірімізбен сыйластыққа жетелеп, жақсылық атаулыға үндейтін мұндай мереке барша қазаққа ортақ болса, артық етпейді деп ойлаймын. Осы орайда жыл сайын Көрісу күніне орай тәрбиелік мәні бар түрлі іс-шараларды ұйымдастыра берсек, одан ұтылмаймыз. Мысалы, біздер, ардагерлер мереке қарсаңында Хамза Есенжанов атындағы облыстық балалар мен жасөспірімдер кітапханасында жас жеткіншектерге Көрісу күні туралы айтып, өз өнерлерімізді көрсеттік, батамызды бердік. Басқа да іс-шараларды өткізудеміз. Міне, осылайша Көрісу күнінің мән-маңызын кейінгі жастарға жеткізе түспекшіміз.
-Әңгімеңізге рахмет!
