Көркем гимнастика: Елжана Таниева Олимпиада финалына өте алмады

ПАРИЖ. KAZINFORM – Франция астанасы Париж қаласында өтіп жатқан Олимпиада ойындарында бүгін көркем гимнастикадан іріктеу аяқталып, көпсайыста ертең жүлдеге таласатын спортшылар белгілі болды.

Өкінішке қарай, ел намысын қорғап жатқан отандасымыз Елжана Таниева аталған сында төрт жаттығудың қорытындысы бойынша финалға өте алмай қалды.

Елжана Таниева төрт жаттығудың нәтижесі бойынша 126.600 ұпай жинап, жалпы есепте қазір 11-орынға сырғыды.

Осылайша, биыл Азия чемпионы атанған Елжана Таниева Париж олимпиадасының финалына шыққан 10 гимнастың қатарына кіре алмады.

Олимпиада жүлдесіне тек, финалға шыққан 10 гимнаст ғана таласады.

Таниеваның көрсеткіші:
Лента - 31.450 балл
Ұршық - 32.300 балл
Доп - 32.000 балл
Шығыршық - 30.850 балл

Финалға шыққан спортшылар Олимпиада медальдарын ертең, яғни 9 тамызда сарапқа салады.