Коронавирус: Қытай дзюдошылары Париждегі Grand Slam турниріне қатыспайды
НҰР-СҰЛТАН. ҚазАқпарат – Қытайлық дзюдошылар Парижде 8-9 ақпанда өтетін Grand Slam турниріне қатыспайды, деп хабарлайды ҚазАқпарат тілшісі.
Ұлттық олимпиада комитеті мәлім еткеніндей, коронавирустың өршуіне байланысты Қытайдағы Франция елшілігі жабылған.
Елшілік 10 ақпаннан бұрын ашылмайды, демек, қытайлық делегацияға виза алуға мүмкіндік жоқ. Осыған байланысты Қытай дзюдо федерациясы Париждегі Grand Slam турниріне қатысуы тиіс спортшыларын шақыртып алды.
Халықаралық дзюдо федерациясы (IJF) ең алдымен спортшылардың денсаулығы басты орында тұратындығын атап өтіп, қытайлық спортшылардың алда болатын басқа әлемдік жарыстарға қатысуына тілекші екендігін жеткізді.
Еске сала кетейік, бұдан бұрын Елдос Сметов бастаған 16 дзюдошының Париждегі Grand Slam турнирінде бақ сынайтынын жазған болатынбыз.
