Коронавирустан балалар арасында өлім-жітім болған жоқ – Денсаулық министрлігі

НҰР-СҰЛТАН. ҚазАқпарат –Коронавирус жұқтырған жүзден астам бала ауруханада емделіп жатыр. Бұл туралы Денсаулық сақтау вице-министрі Ажар Ғиният айтты, деп хабарлайды ҚазАқпарат тілшісі.

«Қазіргі таңда республика бойынша коронавирус жұқтырғаны расталған 73,4 мыңнан асты. 61,8 пайызы емделіп шығып отыр. Пневмониямен ауырып жатқан адамдардың саны ауруханаларда 8 мыңға жуық. Осы 8 мың науқастың ішінде мамыр айынан бастап 1 мыңнан астам бала ауырды. Қазір жүзден астам бала емханада ем алуда. Балалар коронавирус инфекциясының өте жеңіл түрімен ауырып жатыр. Балалар арасында осы инфекциядан ешқандай өлім-жітім тіркелген жоқ», - деді Ажар Ғиният ОКҚ-да өткен баспасөз мәслихатында.

Еске сала кетсек бұған дейін Денсаулық сақтау министрі Алексей Цой Қазақстанда коронавирустан 59 медициналық қызметкер көз жұмғанын хабарлаған болатын.