Көші-қон заңнамасын бұзған шетелдік азаматтар Қазақстаннан шығарылды

ПАВЛОДАР. KAZINFORM - Полицейлер заңсыз жүрген шетелдік азаматтарға жұмыс орнын және баспана ұсынатын тұрғындар жауапкершілікке тартылатынын ескертіп отыр.

Ертіс-Баян өңірінде заңсыз еңбек қызметін жүзеге асыру және ел аумағында заңсыз болу деректері бойынша Өзбекстан мен Тәжікстанның азаматтары ұсталып, сот шешімімен ел аумағынан шығарылды.

Өңірлік полиция департаментінің мәліметінше, Екібастұз полицейлері еңбек қызметін заңсыз жүзеге асырудың екі дерегін анықтаған. Жергілікті зауыттардың бірінде Өзбекстан Республикасының алты азаматы және қайталама шикізатты қайта өңдеу цехында Тәжікстан Республикасының екі азаматы ұсталған. 

«Шетелдік азаматтарда уәкілетті органның тиісті рұқсаты болмай шықты, ал жұмыс беруші шетелдік азаматтардың болуы туралы полицияға хабарламаған. Көші-қон заңнамасын бұзғаны үшін заң бұзушыларға қатысты материалдар сотқа жіберілді. Сондай-ақ Павлодарда Тәжікстан Республикасының азаматы еңбек қызметін уәкілетті органның рұқсатынсыз жүзеге асырған. Ол төлқұжатының жарамдылық мерзімі аяқталғанына қарамастан Қазақстан аумағында жүре берген. Шетелдік қабылдағыш-таратқыш мекемесіне орналастырылды. Ал оған баспана ұсынғаны үшін павлодарлық тұрғынға 49 мың теңгеден астам айыппұл салынды. Көші-қон заңнамасын бұзғаны үшін төрт шетелдік сот шешімі бойынша Қазақстаннан шығарылды», - деп хабарлады полиция департаментінен.

Жергілікті полицейлер арнайы тексеру іс-шараларын жүргізіп, бір күнде 55 әкімшілік құқық бұзушылықтың жолын кескен. Оның 33-ін шетел азаматтары жасаған.

Еске сала кетейік, 175 шетелдік такси жүргізушісі ел аумағынан шығарылды.