Көшеде шолақ мылтықпен жүрген Шымкент тұрғыны ұсталды
Полицейлер сөмкесінде мылтығы бар 18 жастағы азаматты кездейсоқ ұстады. ОҚО ІІД баспасөз қызметінің мәліметтерінше, кешке сағат 18:00 шамасында Шымкент көшелерінде полицейлер көшеде бақылау жүргізу камералары арқылы сауда орталығының жанында үш жас азаматтың темекі тұқылдарын жерге тастағанын көріп қалады.
Тәртіп сақшылары тәртіп бұзушыларды тоқтатып, әкімшілік құқық бұзушылық туралы хаттама толтырмақ болған. Сол кезде олардың назары иығына дорбасын асып алған 18 жастағы азаматқа түскен. Полицейлер оны тексеру кезінде дорбасынан бөлшектелген 20-шы калибрлі аңшы мылтығын анықтаған.
Тәртіп бұзушылар Шымкент ІІБ Еңбекші полиция бөлімшесіне жіберілді. Аталған факті бойынша ҚР ҚК-нің 287 бабымен («Қару, оқ-дәрілер, жарылғыш заттар мен құралдарды заңсыз сатып алу, тапсыру, сату немесе сақтау, тасымалдау немесе ұстап жүру») қылмыстық іс қозғалды. Айғақ дәлелдер алынды. Күдікті азамат ешқайда кетпеу қолхатын толтырды.