Көшпенділер ойындарында ел намысын қорғаған 53 сайыс аттың 27-сі ғана талапқа сай болды - жылқытанушы

АСТАНА. KAZINFORM –Ұлттық спорт жоғары мектебінің бір жылдық жұмысын қорытындылаған жиында елімізде спортқа жарамды аттардың тапшы екені айтылды.

Жиында белгілі жылқытанушы, ғылым докторы Нәбиолда Кикебаев Астанада өткен V Көшпенділер ойынына дайындық кезінде елде халықаралық деңгейдегі жарыстардан жүлде ілуге жарамды жылқының тым тапшы екеніне көз жеткізгендерін айтты.

Ойындардың алдында құрылған кешенді ғылыми топ көкпар, аударыспақ, жамбы ату, теңге ілу спортынан сайысқа түсетін аттардың функционалдық дайындығына ғылыми зерттеу жүргізген. Нәбиолда Кикебаев сол зерттеулерде анықталған проблемаларды атады.

- Сайыстарға іріктелген 53 аттың 27-сінің ғана жағдайы «қалыпты» деп бағаланды. 19 аттың жасы 11-ден асып кеткен. Бұл ат спортында «кәрі» жас болып есептеледі. Үш ат ақсап келді, тағы үш аттың буындарынан зақым табылды. Үш аттың сіңірі созылған болып шықты. Екі аттың арқасы кеткен, төрт аттың тым арық екені, екі аттың тұяғына күтім қажеттігі анықталды. Уақты тығыз болғандықтан осы ақауларға қарамастан іріктелген құрамды жарысқа түгел жібердік, шама келгенше емдеп, баптап қостық. Сайыс аттарының жемшөбіне де қажетті деңгейде көңіл бөлінбейтіні белгілі болды. Сондықтан әр аттың мүмкіндігіне қарай азық мәзірін жасап ұсындық, - дейді жылқытанушы.

Ғалым жылқы спортын ғылыми негізде дамыту бастамасы орта жолда қалмаса деген тілегін де айтты.

- Ғылыми жұмыстар кезінде салаға мақсатты түрде қаржы бөлінбейтінін, қалдық принципімен ғана бағытталатыны көрінді. Саланы мақсатты түрде қаржыландыру үшін кемінде 1,3 млрд теңге керек. Спорт сайыстарына жарамды аттың тапшылығы бар. Республика бойынша 1921 ат қана деген тым аз. Елдегі әр ауданда атшабар, ат спортының бір мектебі, ол мектептің өз манежі болу керек. Осыны стандартқа айналдыру қажет, - деді Нәбиолда Кикебаев.

Осыған дейін Қостанай жылқы зауыты көкпар мен аударыспақ аттарын сұрыптауға кірісетіні туралы жаздық.