Қосшы тұрғынын бірнеше жерден пышақтап өлтірген күдікті ұсталды
КӨКШЕТАУ. ҚазАқпарат - Ақмола облысындағы Қосшы қаласы тұрғынының өліміне қатысты қылмыстық іс тергелуде, деп хабарлайды ҚазАқпарат тілшісі.
Облыстық Полиция департаменті баспасөз қызметінің мәліметінше, биылғы жылдың 15 қаңтарында кешкі сағат 22:45 шамасында Қосшы қалалық ПБ кезекші бөліміне жергілікті тұрғын хабарласып, пышақ жарақатын салу оқиғасының куәгері болғанын айтты.
«Оқиға орнына дереу жедел-тергеу тобының қызметкерлері жетті. Тәртіп сақшылары жеткенде 56 жастағы ер адам іші, мойын, сол жақ иық және шеке тұсына салынған пышақ жарақатынан көз жұмған. Осы оқиғаға байланысты Қылмыстық кодекстің 99-бабы «Адам өлтіру» бойынша сотқа дейінгі тергеу амалдары қолға алынды. Жедел-іздестіру шаралары барысында полиция қызметкерлері күдіктінің жеке басын анықтады. Ол көз мерт болған адамның 57 жастағы танысы болып шықты. Күдікті бұрын сотты болмаған, ол бірден қамауға алынды», - деді ведомстводан.
Анықталғандай, ер адамдар бірлесіп, алкоголь ішімдік ішкен. Кейін араларында жанжал туындап, күдікті бөтелкелесіне пышақ салады. Оқиға орнынан 4 пышақ тәркіленді. Сот-медициналық сараптама тағайындалды.
