Қостанай мен Ташкент арасында тікелей әуе рейсі ашылады

ТАШКЕНТ. KAZINFORM – Centrum Air әуе компаниясының ұшақтары 13 маусымнан «Ташкент - Қостанай - Ташкент» бағыты бойынша рейс орындай бастайды, деп хабарлайды Kazinform агенттігінің Ташкенттегі меншікті тілшісі.

Компаниядан мәлім еткендей, рейс аптасына бір рет, яғни сенбі күндері орындалады. Жол ұзақтығы - 2 сағат 20 минут. Билет құны 38 мың теңгеден басталады.

Еске салайық, 29 наурыздан бастап Астана мен Ташкент арасында тағы бір тікелей әуе рейсі ашылды.

Ал 30 наурызда «Ташкент - Атырау - Ташкент» бағыты бойынша жаңа әуе рейсі іске қосылды.

Бұған дейін хабарлағанымыздай, биыл үш айда 680 мыңнан астам қазақстандық Өзбекстанға саяхаттап барған.