Қостанай облысында табиғи өртті сөндіру жұмыстары жалғасып жатыр

ҚОСТАНАЙ. KAZINFORM – Өрт Қостанай облысына қарасты Әулиекөл ауданымен шекаралас Б.Майлина ауданы даласында басталған. Желдің бағытымен өрт Әулиекөл ауданына қарай таралып жатыр. 

Қостанай облысы Төтенше жағдайлар департаменті баспасөз қызметінің мәліметінше, өртті сөндіруге оқиға орнына облыстық ТЖД, жергілікті атқарушы органдар, еріктілер және өртке қарсы құрылымдар келді. Сондай-ақ тілсіз жауды ауыздықтауға орман шаруашылығынан 60-тан астам қызметкер, 20-дан астам техника, өрт сөндіру пойызы жұмылдырылды. Сонымен қатар тікұшақ арқылы әуеден барлау жүргізілді.

Қазіргі кезде өртті сөндіру жұмыстары жалғасып жатыр. Желдің ұйытқуы жағдайды қиындатып отырғанын да айта кеткен жөн. 

Еске салсақ, бұған дейін Баянауылда ұлттық паркке қарасты жерлер өртенгенін жазған едік.