Қостанай облысының аумағында бруцеллез тіркелді
АСТАНА. KAZINFORM — Жергілікті атқарушы органдар аурудың анықталуына байланысты шектеу енгізуді ұсынып отыр, деп хабарлайды Kazinform агенттігінің тілшісі.
Жоба «Ашық НҚА» сайтында жарияланды. 2025 жылдың 10 ақпанына дейін талқылау өткізіледі.
— Қостанай облысы Қарабалық ауданы Қособа ауылдық округі Славенка ауылындағы «А. С. Кузьминых» шаруа қожалығының аумағында ірі қара малдан бруцеллез ауруы анықталуына байланысты шектеу шаралары белгіленсін, — делінген құжатта.
Сондай-ақ, ветеринарларға жаңадан анықталған эпизоотиялық ошақта қажетті санитариялық-эпидемияға қарсы және ветеринариялық-санитариялық іс-шараларды жүргізу қажет болады.
Еске салсақ, бұдан бұрын СҚО-да былтыр 529 ірі қарадан бруцеллез анықталғанын жаздық.
Дегенмен жұқпалы дерт тек малға ғана емес адамдарға да жұғып жатыр. Мәселен ШҚО-да 2024 жылы 36 адам бруцеллез жұқтырғаны белгілі болды.
