Қостанай облысында шетелдік нөмірлі көліктердің қатысуымен 872 жол апаты болған
ҚОСТАНАЙ. ҚазАқпарат - Қостанай облысында ресейлік тіркеудегі көліктердің қатысуымен көптеген жол-көлік оқиғалары орын алды. Тек бір күннің ішінде бірнеше апат орын алады. Қостанай облысының полиция департаментінде жол-көлік оқиғаларының статистикасы айтылды, деп хабарлайды ҚазАқпарат.
«Жыл басынан бері облыс аумағында шет мемлекеттерде тіркелген көлік құралдарын басқарған жүргізушілердің кінәсінен 872 жол апаты тіркелді. Оның ішінде 812 жол-көлік оқиғасы материалдық шығынға ұшыратса, 60- ында адамдар зардап шеккен. Оның ішінде 14 адам (бұл жол-көлік оқиғаларында қаза болғандардың жалпы санының 20%-ы – 71) қаза тауып, 66 адам жарақат алды», - деп хабарлады ведомствоның баспасөз қызметі. Мәселен, небәрі бір күнде ресейлік есептегі көліктердің қатысуымен 6 жол-көлік оқиғасы тіркелді. «Атап айтқанда, 8 қараша күні сағат 16:00-де Қостанай қаласының Дөненбаев көшесінің бойында Ресей Федерациясының мемлекеттік нөмірлері бар ГАЗ 33023 автокөлігінің 38 жастағы жүргізушісі жол қозғалысына назар аудармай, «Лада» автокөлігімен соқтығысты» - деген мысал келтірді полициядан. – Сол күні «102» пультіне Ресей Федерациясының мемлекеттік тіркеу нөмірі бар «ВАЗ» автокөлігінің жүргізушісі жол-көлік оқиғасын жасап, оқиға орнынан ізін суытқаны туралы хабарлама түсті. Көлік іздестірілуде.
