Қостанайда есірткі саудалаған қылмыстық топтың қалай ұсталғаны жарияланды
ҚОСТАНАЙ. ҚазАқпарат – Қостанай облыстық полиция департаментінде өткен брифинг барысында Қазақстанның оңтүстік аймақтарынан Қостанай және Нұр-Сұлтан қалаларына есірткі жеткізу және саудалаумен айналысқан қылмыстық топтың қалай ұсталғаны айтылды, деп хабарлайды ҚазАқпарат.
Қостанай полицейлері қылмыскерлерді 22 наурыз күні еліміздің бірнеше өңірінде ұстады. Ведомство мәліметінше, жедел-іздеу шаралар кешенін өткізу барысында облыстық ПД есірткі қылмысына қарсы күрес жүргізу басқармасының қызметкерлері істің басты күдікті Денисов ауданының 51 жастағы тұрғынын анықтаған.
«Ер адам 2021 жылдың қаңтарында 8 адамнан құралған тұрақты қылмыстық топты ұйымдастырды. Есірткіні саудалау мақсатында ол жергілікті бес тұрғынды тартты. Көтерме партияларды Жамбыл облысы Шу ауданының 67 жастағы тұрғыны жеткізіп отырған, курьер рөлінде Нұр-Сұлтан қаласының тұрғыны болды. Есірткінің кезекті партиясын тасымалдау кезінде курьерден салмағы 5 келіден асқан гашиш салынған орама тәркіленді», - деп баяндады ведомстводан.
Бұдан басқа, топ ұйымдастырушысының тұрғылықты жерінен престелген 26 таблеткасы, сондай-ақ ақша мен банк карталары анықталды.
«Топ қатысушыларынан алынған есірткі заттарының жалпы салмағы – 10 келіден астам гашиш мен марихуана. Полицейлердің 7 тобы қылмыскерлерді бір уақытта Қостанай, Жамбыл облыстарынан және Нұр-Сұлтан қаласынан ұстады», - деді полиция департаментінен.
Облыстық есірткі қылмысына қарсы күрес жүргізу басқармасының бастығы Асылбек Әлмағамбетовтің айтуыынша, тәртіп сақшылары жыл басынан бері есірткіге қатысты 130-дан астам қылмыс пен құқықбұзушылықты анықтады. Тәркіленген есірткінің жалпы салмағы 17 келіден асты.
Авторы Жанна Мұсабаева
