Қостанайда тоқ соққан қызды емдеуге Ұлттық шұғыл медицинаны үйлестіру орталығының мамандары келеді

ҚОСТАНАЙ. ҚазАқпарат – Қостанай облысының денсаулық сақтау басқармасының өкілдері «көбік кешінде» тоқ соққан Ұзынкөл ауданы тұрғынының жағдайы туралы айтты, деп хабарлайды ҚазАқпарат.

Қызды емдеуге Ұлттық шұғыл медицинаны үйлестіру орталығының мамандарын тарту жөнінде шешім қабылданды.

Мекеме жетекшісі Данияр Жандаевтың айтуынша, кішкентай қыз Ұзынкөл аудандық ауруханасына өте ауыр жағдайда түскен. Болған оқиға туралы аудандық аурухана өкілдері облыстық балалар ауруханасына хабарлаған.

«Санитарлық авиациямен реаниматологтар келу керек деген шешім қабылданды. Қыз мұқият тексеруден өткізілген соң облыстық балалар ауруханасына жеткізілді. Ол қазір де сонда ем алып жатыр»,-деді Жандаев.

Видеодан алынған кадр: Қостанай облысы денсаулық басқармасы

«Облыстық ауруханаға келген соң санитарлық авиация желісі бойынша қыздың денсаулығына қатысты республика көлемінде мамандардан кеңестер алдық. Соңында Ұлттық шұғыл медицинаны үйлестіру орталығының екі маманын тарту жөнінде шешім қабылданды».

Ол мамандар Қостанай облысының балалар ауруханасына ертең келеді.

«Біздің дәрігерлер қыздың денсаулығын нығайтуға бар күш-жігерін салып жатыр»,-деп түйіндеді облыстық денсаулық сақтау басқармасының жетекшісі.

Осыған дейін Қостанай облысында көбік кешінде кішкентай қызды ток соққанын хабарладық.

Жанна Мұсабаева