Қостанайдағы автопаркте автобустар өртенді

АСТАНА. KAZINFORM – ҚР Төтенше жағдайлар министрлігі баспасөз қызметінің хабарлауынша, түн ортасында «101» пультіне күзету қызметінен Қостанай қаласындағы автобус паркінің аумағында автомобиль боксынан түтін шыққаны туралы хабарлама келіп түсті.

Қою түтінге қарамастан, газ-түтіннен қорғау қызметі барлау кезінде бокста бес автобустың жанып жатқанын анықтады. Өрт сөндірушілер өрттің одан әрі таралуына жол бермей, 27 қалалық автобустар мен бокс конструкцияларын өрттен аман сақтап қалды.

«Өрт алдын ала 220 шаршы метр алаңда оқшауланды. Нақтыланған ақпарат бойынша бокста 5 автобус жанған»,-делінген хабарламада.

Осыған дейін Алматыда көпқабатты үйдің автотұрағында тұрған екі жеңіл көлік жанып кеткені туралы жаздық. Ол кезде де оқиға түнгі уақытта болған.