Қостанайлық әскери қызметшілер жолда қалған жүргізушіге көмектесті
ҚОСТАНАЙ. KAZINFORM – Қазақстан Республикасы Ұлттық ұланы «Орталық» өңірлік қолбасшылығының 6697 әскери бөлімінің әскери қызметшілері автокөлігі Қостанай-Арқалық тас жолының шетіне шыққан жүргізушіге көмек көрсетті.
Су тасқынына қарсы іс-шараларға қатысу үшін Арқалық қаласына бет алған әскери қызметшілер жолда қарға батқан көлікті байқаған. Олар көліктерінен түсіп, жүргізушіге жәрдемдесті. Жедел іс-қимылдың арқасында әскери қызметшілер көлікті қар үйіндісінен шығарып алды.
— Қатты тұман болғандықтан, мен рөлді игере алмай жол шетіне шығып кеттім. Ұлттық ұланның әскери қызметшілері бірден көмекке келді және менің көлігімді басқа көлік жүргізушісімен бірге шығарды. Оларға айтар алғысым шексіз, - деді жүргізуші Ержан Оспанов.
Осыдан кейін әскери қызметшілер Арқалыққа барып, өз жолын және қызметтік міндеттерін орындауды жалғастырды.
Бұған дейін Ақтөбеде полиция қызметкері жол апатына түскенін жазған едік.
