Қожағапанов ісі: қорғаушы тарап сот үкімімен әлі күресіп жатыр
АСТАНА. KAZINFORM – Елорда соты бұрынғы Мәдениет және спорт вице-министрі Ерлан Қожағапанов пен SUCCESS K агенттігінің бас директоры Ләззат Көккөзованың үстінен қозғалған қылмыстық іс бойынша апелляциялық шағымды қарауды жалғастырып жатыр.
Бүгінгі сот отырысында Ләззат Көккөзованың апелляциялық шағымы жария етілді. Ол жерде 2018 жылы оның компаниясы форум өткізуге коммерциялық ұсыныс түскені айтылған. Аталған ұсынысты агенттік жүздеген мекемеге таратқан. Таңдау SUCCESS K компаниясына түскенімен, Ерлан Қожағапановпен алдын ала келісім жасалғанын тергеу дәлелдей алмаған. Сонымен қатар тапсырыс берушілер де, қатысушылар да өткізілген форумға қатысты ешқандай шағым түсірмеген.
SUCCESS K агенттігінің бас директоры Ләззат Көккөзованың адвокаты Мәкіш Ескараевтың айтуынша, айыптау қорытындысында да, бірінші сатыдағы сот үкімінде де оның қорғауындағы тұлға мен Ерлан Қожағапанов арасында сөз байласу туралы ештеңе көрсетілмеген. Соған қарамастан екеуі де бір процесс аясында сотталған.
Одан бөлек қорғаушы тарап тергеу барысында жүргізілген аудитті дәлел ретінде қабылдауға болмайды деп есептейді. Өйткені іс негізінен екі құжатқа – «Қызмет бағалау» ЖШС-нің сараптамасы мен «Даму-аудит» ЖШС-нің қорытындысына ғана сүйенген. Адвокаттың сөзінше, Ләззат Көккөзованың компаниясы атқарған жұмыс пен көрсеткен қызмет толық көлемде бағаланбаған.
Еске салайық, былтыр 1 наурызда Сыбайлас жемқорлыққа қарсы қызмет Мәдениет және спорт экс-вице-министрін ауыр жемқорлық қылмыс жасады деген күдік бойынша ұстады.
Антикордың ақпаратынша, ол 2018 жылы Петропавл қаласында Қазақстан Республикасы мен Ресей Федерациясының XV өңіраралық ынтымақтастық форумының көрмесін ұйымдастыру бойынша шарт жасасуды қолдаған.
Биыл мамырда бұрынғы вице-министр Ерлан Қожағапановға қатысты сот үкімі шықты.
Ал тамызда Ерлан Қожағапановтың үкіміне шағым түсірілді.
Сондай-ақ бұрынғы Мәдениет және спорт вице-министрі Ерлан Қожағапанов соттан өзін ақтауды сұрады.
