ҚПЛ: «Тобыл» мен «Елімай» тең түсті

АСТАНА. KAZINFORM - Футболдан Қазақстан Премьер-лигасының үшінші турында қостанайлық «Тобыл» мен семейлік «Елімай» командалары кездесті. 

Екі команда биыл жүлделі орындарға қол жеткізуді қалайды. Сондықтан әрбір кездесуде олар ұпай олжалауды көздейді.

Бүгінгі ойын барысында қостанайлық клуб сапынан Николай Сигненвич 9-минутта көзге түсті. Оған семейлік командадан Флореску Эдуард-Мариан 92- минутта бір голмен жауап қайырды.
Осылайша қарсыластар 1:1 есебіне қанағат білдірді.

Тең есеп «Ордабасы» (Шымкент) мен «Қызылжар» (Петропавл) кездесуінде де тіркелді. Қос команда бір ұпайдан еншіледі. 

Айта кетсек, ел біріншілігінің үшінші турында елордалық «Астана» өз алаңында талдықорғандық «Жетісуды» 3:0, «Ақтөбе» сырт алаңда «Атырауды» 4:0 есебімен тас-талқан етіп жеңсе, «Ұлытау» мен «Жеңіс» (Астана) 1:1 есебімен тең тарқасты. 

Аталған турдың алғашқы ойын күні, 29 наурызда «Қайрат» сырт алаңда түркістандық «Тұранды» 2:1 есебімен тізе бүктірсе, «Қайсар» (Қызылорда) мен «Оқжетпес» (Көкшетау) 2:2 есебін тіркеді.

Алдағы тур ойындары 5 және 6 сәуір күндеріне белгіленген.